Yangiliklar: Aprel 2022

Mamlakatimizning innovatsion salohiyatini yanada rivojlantirishni maqsad qilgan, kreativ fikrlaydigan yoshlar, isteʼdodli professor-oʻqituvchilar, yosh olimlar va ilmiy tadqiqotchilar, pedagoglar va iqtisodiyot tarmoqlari mutaxassislari diqqatiga!

“El-yurt umidi” jamgʻarmasi ilgʻor xorijiy davlatlar nufuzli universitetlari va ilmiy markazlarida bakalavriat, magistratura va doktoranturada taʼlim olish uchun 2022-yilgi 2-stipendiya tanlovini eʼlon qiladi!

“El-yurt umidi” jamg‘armasi 2022-2023 o‘quv yili uchun:

* bakalavriat taʼlim dasturi uchun 51 oʻrin,

* magistratura taʼlim dasturi uchun 145 oʻrin,

* doktorantura taʼlim dasturi uchun 110 oʻrin stipendiyalar ajratishini maʼlum qiladi.

Nomzodlarning hujjatlari 2022-yil 15-apreldan – 15-mayga qadar, respublikaning barcha hududlari vakillari uchun yagona tartib va teng imkoniyat asosida, onlayn rejimda va elektron tarzda qabul qilinadi.

Saralash bosqichlari 2022-yil 15-maydan – 15-iyunga qadar davom etadi.

Saralash tanloviga oid barcha maʼlumotlar “El-yurt umidi” jamgʻarmasining www.eyuf.uz  sayti orqali batafsil eʼlon qilib boriladi.

Nomzodlar uchun barcha zarur maʼlumotlar Jamgʻarmaning Onlayn hujjat topshirish platformasida batafsil yoritib berilgan: undefined

2022-yil 23-aprel kuni Urgut tumanidagi 100-maktab o‘quvchilari “Ipak yo‘li” universitetiga tashrif buyurishdi. Mehmonlarga universitet faoliyati, an’analari, qadriyatlari, professor-o‘qituvchilari haqida ma’lumotlar berildi.

Ekskursiya davomida ularga o‘quv-ishlab chiqarish kompleksiga kiruvchi mehmonxona xonalari, bar-restoran; ilg‘or texnologiyalar bilan jihozlangan va 250 kishiga mo‘ljallangan konferens-zal; kafeteriy usulida qayta ta’mirlangan oshxona; universal sport zali; shuningdek, kutubxona va suv havzasi namoyish etilib, batafsil ma’lumotlar berildi.

#5_MUHIM_TASHABBUS_AMALDA

Joriy yilning 21-22-aprel kunlari “Ipak yo‘li” turizm va madaniy meros xalqaro universitetida “Uchinchi Renessansni shakllantirish sharoitida turizm sohasini rivojlantirish istiqbollari” mavzusida ilmiy-amaliy konferensiya bo‘lib o‘tdi.

Konferensiya doirasidagi birinchi kunida ishtirokchilar bahs-munozaralar tarzida to‘rt mintaqa: Afrika, Sharqiy Osiyo, Markaziy Osiyo, Janubiy Osiyoning turizm salohiyati va rivojlanish omillarini tahlil qilishdi.

Konferensiyaning ikkinchi kunida turizm sohasidagi asosiy muammolarni hal etish, ilg‘or turizm mutaxassislari tajribasini O‘zbekistonda tatbiq etish yo‘llari muhokama qilindi. Qizg‘in muhokamalar natijasi rezolyutsiya bilan rasmiy xat yozish bo‘ldi.

Konferensiya “Ipak yo‘li” universitetida iliq va do‘stona ruhda, sog‘lom raqobat muhitida o‘tkazildi. Ma’ruzachilar yuqori darajadagi tayyorgarlikni namoyish etdilar, berilgan barcha savollarga javob berib, ilmiy fikrlash, fikrlarining dolzarbligi va ilmiy yangiligini ishonchli tarzda isbotladilar.

Konferensiya yakunlariga ko‘ra quyidagi g‘oliblar aniqlandi:

“The Best Speaker” nominatsiyasida – Nilyufarxon Ashuraliyeva;

“The Best Group” jamoaviy nominatsiyasida – “Turkiston” jamoasi.

“Ipak yo‘li” turizm va madaniy meros xalqaro universitetida  “Tillar” kafedrasi mustaqil izlanuvchilari Akramova Taxmina Komiljonovnaning «Идейно – художественные образы произведений Эдгара Аллана По и способы их воссоздания в переводе»,  Abduvaxobova Umida Mamayusupovnaning «Прагмо-стилистические средства описания человеческих ценностей в оригинале и переводах произведений Герберта Бейтса» va Ablakulova Iroda Kamolidinovnaning «XX asr o‘zbek romanlarining ingliz tiliga tarjimasida milliylikning ifodalanishi» mavzusidagi 10.00.06 – “Qiyosiy adabiyotshunoslik, chogʻishtirma tilshunoslik va tarjimashunoslik” ixtisosligida filologiya fanlari bo‘yicha falsafa doktori (PhD) ilmiy darajasini olish uchun tayyorlayotgan dissertatsiya ishlarining dastlabki natijalari bo‘yicha mustaqil ma’ruzalari tinglandi, hamda T.K.Akramova, U.M.Abduvaxobova va I.K.Ablakulovani mutaxassislik fanidan imtihon topshirishga tavsiya etildi. Yig’ilishda universitetning Birinchi prorektori prof.J.D.Eltazarov, Ilmiy bo’lim boshlig’i PhD. N.Mansurova , “Tillar” kafedrasi mudiri PhD, dots. v.b. T.I.Sultanov hamda “Tillar” kafedrasining professor-o’qituvchilari qatnashishdi.  

Universitet talabalar Parlamenti Prezidentligiga saylov shaffof bo‘lishi lozim, shuning uchun ushbu jarayon oldidan barcha talabalar har bir nomzod bilan yaqindan tanishish imkonini beradigan munozaralar tashkillashtirildi.

Xususan, joriy yilning 22-aprel kuni “Ipak yo‘li” turizm va madaniy meros xalqaro universitetida talabalar Parlamenti Prezidentligiga nomzodlar o‘rtasida davra suhbati bo‘lib o‘tdi. Saylov komissiyasi tomonidan Prezidentlikka to‘rtta nomzod ro‘yxatga olindi.

Ta’kidlash joizki, munozaralar klassik ko‘rinishda emas, balki nomzodlar o‘zlari haqida gapiradigan, jamoatchilikni o‘z dasturlari bilan tanishtiradigan va talabalar muammolarini muhokama qilish uchun ko‘tarilgan bahs-uchrashuv ko‘rinishida bo‘lib o‘tdi. Shu tariqa, nomzodlar saylovchilar oldida mas’uliyatni his qilishdi, saylovchilar esa, o‘z navbatida, nomzodlarning rejalari bilan tanishishdi. Noan’anaviy munozaralarning o‘tkazilishi talabalarning kimga ovoz berishishida qat’iy qaror qilishiga turtki bo‘ladi.

Munozara nafaqat muhim bo‘lgan asoslash ko‘nikmalari, tanqidiy fikrlash, ritorik texnika kabi mahoratlarni orttirishga, balki prezidentlik davrida strategiyalashtirishda ustuvor yo‘nalishlarni belgilashga yordam beradi.

O‘zbekiston Respublikasi Prezidenti Shavkat Mirziyoyevning oliy ta’lim muassasalari talabalari bandligini ta’minlash borasidagi vazifalarini amalga oshirish maqsadida joriy yilning 22-aprel kuni “Ipak yo‘li” turizm va madaniy merosi xalqaro universitetida “Career-2022” mehnat yarmarkasi tashkil etildi.

Mazkur tadbirdan ko‘zlangan maqsad malakali kadrlar bilan bandligini ta’minlash, shuningdek, talabalarni ish bilan ta’minlash, doimiy daromad manbaini topishlariga ko‘maklashish, shu jumladan, ish beruvchilar bilan bevosita aloqada bo‘lishga keng jalb etishdir.

Mazkur yarmarkada restoran va mehmonxona biznesi vakillari, STC (Samarkand Touristic Center), turfirmalar, Samarqand xalqaro aeroportining yangi terminalida yoʻlovchilarga xizmat koʻrsatish va aviakompaniyalarning yerda xizmat koʻrsatish operatori “Air Marakanda” va boshqa ish beruvchi tashkilotlar ishtirok etishdi.

O‘zbekiston Respublikasi Vazirlar Mahkamasining 2020-yil 11-noyabrdagi «O‘zbekiston Respublikasida 2023-yilda aholini ro‘yxatga olishga tayyorgarlik ko‘rish va uni o‘tkazish chora-tadbirlari to‘g‘risida»gi 710-sonli Qaroriga muvofiq, respublikamizda 2023-yilda aholini ro‘yxatga olish tadbiri oʼtkazilishi belgilangan.

Bunday katta tadbir respublikamizda oxirgi marta 30 yil avval amalga oshirilgan boʼlib, buning natijasida aholining haqiqiy hayot tarzini oʼrganish va ularga amaliy yordam koʼrsatishda qator qiyinchiliklar vujudga kelmoqda.

Bmt 2015 yilning 10 iyunida «2020 yilda aholi va uy-joy fondini roʼyxatga olish borasidagi printsiplar va tavsiyalar» rezolyutsiyasini qabul qildi. Unga koʼra, bmt ga aʼzo davlatlar kamida har 10 yilda bir marta aholi va uy-joy fondini roʼyxatga olishni oʼtkazishi belgilab qoʼyildi. Bugungi kunga kelib, mdh davlatlarida, shuningdek oʼzbekistonda ham bu jarayonga tayyorgarlik ishlari boshlandi.

2022-yil 20-aprel kuni “Ipak yo‘li” turizm va madaniy meros xalqaro universiteti 3-kurs talabasi Mardonov Diyor o‘zining “Sun’iy intellektga ega uchuvchisiz turistik elektromobil” ixtirosiga patent oldi.

Mardonov Diyorning loyihasini moddiy rivojlantirish uchun universitet va talaba o‘rtasida elektromobil loyihasini qisman moliyalashtirishni nazarda tutuvchi Memorandum imzolandi.

“Ipak yo‘li” turizm va madaniy meros xalqaro universiteti rahbariyati Mardonov Diyorga muvaffaqiyatlar va yangi kashfiyotlar sari intilishda hecham tuxtamaslikni tilaydi.

Avvalroq, universitetda o‘tkazilgan “Eng yaxshi startap” tanlovi doirasida Mardonov Diyor va Boybekov Kamronga elektromobil loyihasini takomillashtirishga xizmat qiluvchi pul ekvivalentli sertifikatlari topshirilgani haqida xabar bergan edik.

Joriy yilning 21-aprel kunidan boshlab, “Ipak yo‘li” turizm va madaniy meros xalqaro universitetining majlislar zalida “Uchinchi Renessansni shakllantirish sharoitida turizm sohasini rivojlantirish istiqbollari” mavzusida ikki kunlik ilmiy-amaliy konferensiyaga start berildi.

Ilmiy-amaliy konferensiya tashkilotchilari: “Ipak yo‘li” turizm va madaniy meros xalqaro universiteti, Samarqand iqtisodiyot va servis instituti, Sharof Rashidov nomidagi Samarqand davlat universiteti.

Mazkur sho‘balar doirasida quyidagi masalalar muhokama qilinadi:

1. Uchinchi Renessansni shakllantirish sharoitida turizm sohasining nazariy va metodologik muammolari va ularni hal qilishning strategik yo‘llari.

2. Uchinchi Renessansni shakllantirish sharoitida turizm sohasi samaradorligini oshirish mexanizmlari, rivojlantirish tendensiyalari.

3. Uchinchi Renessansni shakllantirish sharoitida turizm sohasi samaradorligini oshirishda raqobatbardosh kadrlarni tayyorlashni takomillashtirish muammolari.

4. Uchinchi Renessansni shakllantirish sharoitida muzeyshunoslik va madaniy merosning ahamiyati.

5. Uchinchi Renessansni shakllantirish sharoitida turizm industriyasini rivojlantirishda ko‘ptillilikning ahamiyati.

Joriy yilning 21-aprel kuni O‘zMTDP Samarqand viloyat Kengashi, Turizm va madaniy meros boshqarmasi hamda “Ipak yo‘li” turizm va madaniy meros xalqaro universiteti bilan hamkorlikda – “Turizm targ‘ib etish va rivojlantirish oyligi” doirasida O‘zbekiston Respublikasi Prezidentining “O‘zbekiston Respublikasida ichki va ziyorat turizmni yanada rivojlantirish chora-tadbirlari to‘g‘risida”gi farmonida belgilangan vazifalarni bajarishga qaratilgan tadbir o‘tkazildi.  

Tadbir davomida O‘zMTDP Samarqand viloyat Kengashining birinchi o‘rinbosari Isakov Raxmatilla Anarboyevich O‘zbekiston Respublikasi Prezidentining “O‘zbekiston bo‘ylab sayohat qiling!” farmonida belgilangan vazifalar doirasida amalga oshirilgan ishlar haqida so‘zlab berdi.