Yangiliklar: Iyul 2022

Joriy yilning 24-iyul kuni Butunjahon jamiyatining “O‘zbekiston madaniy merosi – Yangi Renessans davri asosi” VI Xalqaro kongressi ishtirokchilari “Ipak yo‘li” turizm va madaniy meros xalqaro universitetiga tashrif buyurdi.

Uch kunlik dastur doirasida mehmonlar madaniy merosni rivojlantirish va asrab-avaylashda ulkan rol o‘ynaydigan “Ipak yo‘li” universitetiga tashrif buyurishdi.

Ekskursiya davomida mazkur kongressning 300 dan ortiq ishtirokchilari universitet faoliyati bilan yaqindan tanishdilar. Ularga xalqaro universitetlar va turizm tashkilotlari bilan hamkorlik natijalari haqida batafsil ma’lumotlar berildi. Ishtirokchilar amaliy mehmonxona xonalari, bar-restoranlardan iborat o‘quv-ishlab chiqarish majmuasi, konferents-zal, universitet oshxonasini ko‘zdan kechirishdi. Mehmonlar Buyuk Ipak yo‘lini aks etiradigan maxsus galereyalarda saqlanayotgan noyob tarixiy elementlari, hamda, ayni paytda universitet sport zalida ShHTga a’zo qator mamlakatlardan kelgan san’at ustalarining rasmlari galereyasi bilan yaqindan tanishdi .

Mehmonlarda madaniy merosni asrab-avaylashga bag‘ishlangan noyob kitoblar to‘plamini o‘z ichiga olgan universitet kutubxonasi katta taassurot qoldirdi. O‘zbekiston Respublikasi Bosh vazirining o‘rinbosari, Turizm va madaniy meros vaziri, “Ipak yo‘li” universiteti rektori Aziz Abduhakimovning sa’y-harakatlari bilan turizm, san’at, tarix, arxeologiya, etnologiya, geosiyosat, iqtisodiyot, madaniyatshunoslik, dinshunoslik, rasm san’ati, haykaltaroshlik, arxitektura, madaniy meros kabi yo‘nalishlar bo‘yicha eng qisqa vaqt ichida kutubxonaga 20 mingga yaqin dunyoning barcha burchaklarida nashr etilgan kitob yetkazib berildi.

Eslatib o‘tamiz, 22-24-iyul kunlari Samarqand viloyati Yoshlar Markazida “O‘zbekiston madaniy merosi zamonaviy ilm-fan diqqat markazida” xalqaro ilmiy konferensiyasi bo‘lib o‘tdi. Tadbir O‘zbekiston madaniy merosini o‘rganish, asrash va ommalashtirish bo‘yicha Butunjahon jamiyati tomonidan Turizm va madaniy meros vazirligi, 10 dan ortiq xalqaro va 5 ta milliy tashkilotlar ko‘magida o‘tkazildi.

2021-2022-o‘quv yilida universitetimizning o‘quv ishlarini rejalashtirish va rivojlantirish bo‘limi boshlig‘i, ayni vaqtda muzeyshunoslik ta’lim yo‘nalishidagi magistratura dasturi koordinatori va magistratura bo‘limi yetakchi mutaxassisi  sifatida faoliyat yuritgan, o‘zining ishchanligi va samimiyati tufayli jamoa orasida obro‘-e’tibor qozongan Nilufar Xasanova Amerika Qo‘shma Shtatlaridagi Montana Universitetining arxeologiya va madaniy meros yo‘nalishi bo‘yicha to‘la hajmli ta’lim grantini  (Full Scholarship) va o‘qituvchi yordamchisi (teaching-assistantship) sifatida faoliyat yuritish imkoniyatini qo‘lga kiritgani munosabati bilan uning “Ipak yo‘li” turizm va madaniy meros xalqaro universitetidagi faoliyati bugun poyoniga yetdi. Universitetning Birinchi Prorektori prof. J.D.Eltazarov shu munosabat bilan unga mehnat sertifikatini (Certificate of Employment) topshirdi.

Yaqin kunlarda kasbdoshimiz AQSHga jo‘nab ketadi.  Hayotining yangi va mas’uliyatli bosqichga qadam qo‘yayotgan Nilufar Xasanovaga universitetimiz ma’muriyati hamda professor-o‘qituvchilar jamoasi nomidan muvaffaqiyat va omadlar tilaymiz. Uning yaqin kelajakda turizm bo‘yicha ilmiy darajali mutaxassis sifatida universitetimizga qaytishiga ishonamiz.

Shu yil 22-23 iyul kunlari Samarqandda bo‘lib o‘tgan Butunjahon madaniy meros jamiyati VI Xalqaro Kongressi qatnashchilarining 2022-yil, 24-iyul kuni universitetimizga tashrifi davomida Baku davlat universiteti, Ozarbayjon adabiyoti tarixi kafedrasi professori Vagif Sultanli universitet kutubxonasiga o‘zining mualliflik kitoblar to‘plamini hadya qildi. Prof. Vagif Sultanli universitet kutubxonasi fondlaridan Ozarbayjon tarixi, madaniyati, tili va adabiyotiga oid kitoblar munosib joy olganidan mamnuniyatini izhor qildi.

Samarqand shahri boʻylab 2 haftalik gastrol safari doirasida Rossiya, Moʻgʻuliston, Tojikiston, Qozogʻiston, Qirgʻiziston va Oʻzbekiston sanʼat ustalari “Ipak yoʻli” universitetiga tashrif buyurishdi.

Faxriy mehmonlarni universitet birinchi prorektori J.Eltazarov kutib oldi. Universitetning noyob smart-kampusi, o‘quv jarayonida qo‘llanilayotgan boshqaruv modeli va ilg‘or texnologiyalar, Buyuk Ipak yo‘lining noyob tarixiy elementlariga boy unikal galereya, hamda universitetning innovatsion kutubxonasi mehmonlarda katta taassurot qoldirdi.

Ayniqsa, O‘zbekiston Respublikasi Bosh vazirining o‘rinbosari, Turizm va madaniy meros vaziri, “Ipak yo‘li” turizm va madaniy meros xalqaro universiteti rektori Aziz Abduhakimovning shaxsiy kutubxonasidan hadya qilingan san’atga oid kitoblar to‘plami mehmonlarning alohida e’tiborlarini tortdi.

Aytish joizki, ikki hafta ichida san’at ustalari universitetning maxsus tayyorlangan studiyalarida ijod qiladilar. Rassomlar o‘z rasmlarida Samarqand madaniyati va an’analarining o‘ziga xosligini aks ettirish niyatida.

Keyinchalik ushbu asarlar universitet galereyasida faxriy joyni egalaydi. Aksiya O‘zbekistonning ShHTga raisligi doirasida o‘tkazilmoqda. Eslatib oʻtamiz, ShHTning navbatdagi sammiti 2022-yilda Samarqand shahrida boʻlib oʻtadi.

Senat majlisining kun tartibida o‘quv jarayoni, ilmiy faoliyat, shuningdek, universitetning xalqaro reytinglardagi pozitsiyasini yaxshilashga oid muhim masalalar ilgari surildi. Yig‘ilishda prorektorlar, kafedra mudirlari, fakultet dekani, universitet rahbariyati vakillari, shuningdek, Turizm va madaniy meros vazirligi turizm va madaniy meros sohalarida ta’lim va ilm-fanni rivojlantirish boshqarmasi boshlig‘i A. Eshtaev ishtirok etdi.

Yig‘ilishdan ko‘zlangan asosiy maqsad 2021-2022 o‘quv yili yakunlarini sarhisob qilish boʻldi.

Senat yig‘ilishi birinchi prorektor J.Eltazarovning 2021-2022 o‘quv yilida amalga oshirilgan vazifalar to‘g‘risidagi ma’ruzasi bilan ochildi. So‘ngra J.Eltazarov o‘tgan Senat faoliyati yakunlarini e’lon qilib, hamkasblarini o‘quv yilini muvaffaqiyatli yakunlangani bilan tabrikladi.

Shuningdek, Senat yigʻilishi chog‘ida universitetni yanada rivojlantirish, jumladan, ta’lim va ilmiy faoliyatini, xalqaro miqyosida nufuzini oshirish, professor-o‘qituvchilar va talabalarni xorijda amaliyot o‘tash masalalari muhokama qilindi.

O‘zbekiston Respublikasi Turizm va madaniy meros vazirligi tizimidagi “Ipak yo‘li” turizm va madaniy meros xalqaro universiteti 2022-2023-o‘quv yili uchun professor-o‘qituvchilarni tanlov asosida ishga taklif etadi

Samarqand shahrida faoliyat yuritayotgan “Ipak yoʻli” turizm va madaniy meros xalqaro universiteti 2022-2023-o‘quv yili uchun quyidagi yo‘nalishlar bo‘yicha professor-oʻqituvchilar lavozimiga yuqori malakali mutaxassislarni ishga taklif etadi:

• Turizm;
• Logistika;
• Turizm huquqi;
• Statistika;
• Buxgalteriya;
• Mehmonxona boshqaruvi;
• Inson resurslarini boshqarish;
• Tadbirlarni boshqarish;
• Iqtisod;
• Menejment;
• Marketing;
• Xorijiy tillar (nemis, fransuz, ispan, koreys, rus, xitoy, arab, ingliz, turk tillari);
• Ijtimoiy fanlar;
• IT fanlari.

Nomzodlarga qoʻyiladigan talablar:

• PhD yoki DSc ilmiy darajasi (agar mavjud bo‘lsa);
• O‘zbekiston Respublikasi Prezidenti administratsiyasining 2022-yil 29-maydagi 02-1415-sonli xati talablariga muvofiq, ingliz tilini (xorijiy til o‘qituvchilari uchun tegishli xorijiy tilni) bilish darajasini tasdiqlovchi C1 darajasiga tenglashtirilgan xalqaro yoki milliy sertifikatga ega bo‘lish (xorijda taʼlim olgan yoki dars bergan mutaxassislarga til bilish sertifikati shart emas);
• nashr etilgan ilmiy va o‘quv-uslubiy ishlar roʻyxati;
• shaxsan nomzod tomonidan ingliz, oʻzbek va rus tillarida tuzilgan mehnat samaradorligi koʻrsatkichi – KPI yoki CV;
• mutaxassislik fanlaridan ingliz tilida (xorijiy tillar uchun tegishli xorijiy tilda) oʻtilgan darsning 20 daqiqalik videotasviri;
• taʼlim sohasida eng kamida 2 yillik tajribaga ega boʻlish;
• kompyuter va elektron qurilmalardan erkin foydalana olish.

“Ipak yoʻli” turizm va madaniy meros xalqaro universiteti ishga qabul qilingan professor-o‘qituvchilarni quyidagi imkoniyatlar bilan ta’minlaydi:

• barqaror maosh (oylik ustama haqi bilan);
• istiqbolli karyerani nazarda tutgan qiziqarli mehnat faoliyati;
• xorij davlatlariga xizmat safari.

Ish tartibi: dushanbadan jumaga qadar (soat 09:00 dan 18:00 gacha).

Tanlovda ishtirok etmoqchi bo‘lgan talabgorlardan quyidagi hujjatlar yig‘ma jildini Этот адрес электронной почты защищён от спам-ботов. У вас должен быть включен JavaScript для просмотра. va Этот адрес электронной почты защищён от спам-ботов. У вас должен быть включен JavaScript для просмотра. elektron manziliga yuborishi so‘raladi:

• PhD yoki DSc diplomi (agar mavjud bo‘lsa).
• Ingliz tilini (xorijiy til o‘qituvchilari uchun tegishli xorijiy tilni) bilish darajasini tasdiqlovchi C1 darajasiga tenglashtirilgan xalqaro yoki milliy sertifikat.
• Nashr etilgan ilmiy va o‘quv-uslubiy ishlar ro‘yxati.
• Shaxsan nomzod tomonidan ingliz, oʻzbek va rus tillarida tuzilgan mehnat samaradorligi koʻrsatkichi – KPI yoki CV.
• Mutaxassislik fanlaridan ingliz tilida (xorijiy tillar uchun tegishli xorijiy tilda) oʻtilgan darsning 20 daqiqalik videotasviri.
• Diplomlar (bakalavr, magistr, PhD yoki DSc) va diplom ilovalaridan nusxa.
• Malaka oshirganligi to‘g‘risidagi sertifikat nusxalari (oxirgi 5 yillik).

Hujjatlarni qabul qilishning oxirgi muddati: 2022-yil 5-avgust.

Murojaat uchun telefon: +99866-240-67-73, +99866-240-67-68.

Joriy yilning 7-iyun kuni “WizzAir Abu Dhabi” kompaniyasining boshqaruvchi direktor Maykl Berlua, davlat idoralari bilan ishlash bo‘yicha katta menejeri Hiba Xalil, davlat idoralari bilan ishlash bo‘yicha mutaxassis Anastasiya Novikova, tarmoqlarni rivojlantirish departamenti boshlig‘i Adria Rabassa, aeroportni rivojlantirish bo‘yicha menejer Akos Palenksar, Investitsiyalar va tashqi savdo vazirligining Birlashgan Arab Amirliklaridagi vakolatxonasi direktori Sarvar Hamidovlardan tashkil etilgan delegatsiya “Ipak yo‘li” turizm va madaniy meros xalqaro universitetiga rasmiy tashrif buyurdi.

“WizzAir Abu-Dhabi” (BAA) vakillari bilan O‘zbekiston Respublikasi Bosh vazirining o‘rinbosari, Turizm va madaniy meros vaziri, “Ipak yo‘li” turizm va madaniy meros xalqaro universiteti rektori Aziz Abduxakimov rasmiy suhbat o‘tkazdi. Davra suhbatida O‘zbekiston aviakompaniyalari va “WizzAir Abu-Dhabi” havo bandargohlari tarmog‘i o‘rtasidagi xalqaro aloqalarni rivojlantirish istiqbollari, O‘zbekiston Respublikasi va BAA o‘rtasida yangi havo yo‘laklarini ochish masalalari muhokama qilindi. Ikki davlatda xalqaro turizmni rivojlantirish mavzusiga ham alohida to‘xtalib o‘tildi. Havo qatnovi uchun eng qulay shart-sharoitlarni yaratish orqali Oʻzbekistonga BAAdan sayyohlar tashrifini oshirish rejalashtirilgan.

Bundan tashqari, tashrif davomida faxriy mehmonlar “Ipak yo‘li” universiteti imkoniyatlari bilan tanishtirildi. Mehmonlarning ta’kidlashicha, universitet kampusining qulay infratuzilmasi, yuqori texnologiyali imkoniyatlar va boy kutubxona ularda katta taassurot qoldirdi. “WizzAir Abu Dhabi” vakillari ta’kidlaganidek, yaqin orada Birlashgan Arab Amirliklaridan talabalar universitetning chet ellik talabalari safini toʻldirishida umidlari komil.

Markaziy Osiyodagi yagona ixtisoslashtirilgan “Ipak yo‘li” turizm va madaniy meros xalqaro universiteti ilk bakalavrlarni diplomlari bilan taqdirladi.

Joriy yilning 6-iyul kuni “Ipak yo‘li” turizm va madaniy meros xalqaro universitetida tantanali va ahamiyatli tadbir bo‘lib o‘tdi. 2018-yilda tashkil etilganidan beri universitet oʻzining ilk bakalavrlarini diplomlari bilan taqdirladi.

Tantanali marosim O‘zbekiston Respublikasi madhiyasi bilan ochildi. O‘zbekiston Respublikasi Bosh vazirining o‘rinbosari, Turizm va madaniy meros vaziri, “Ipak yo‘li” turizm va madaniy meros xalqaro universiteti rektori Aziz Abduxakimov bitiruvchilarni oʻqishlarini muvaffaqiyatli bitirganliklari bilan tabriklab, ularga kasbiy yuksalish va kelgusi faoliyatida omadlar tiladi. Bundan tashqari, Samarqand viloyati hokimi – Erkinjon Turdimov, shuningdek, universitet birinchi prorektori – Juliboy Eltazarov va o‘quv ishlari bo‘yicha prorektor Jozef Hoffmannlar tabrik nutqlari bilan so‘zga chiqishdi.

“Turizm menejmenti” fakultetida turizm sohasida loyihalash, mehmonxona biznesi, ommaviy tadbirlarni boshqarish, turizm sohasida logistika, turizm (faoliyat yo‘nalishlari bo‘yicha), marketing yo‘nalishlarida tahsil olgan 109 nafar bitiruvchi bakalavrga, hamda “Turizm menejmenti” fakultetining 23 nafar magistr va “Turizm” yo‘nalishida sirtqi ta’lim bo‘limining ikkinchi mutaxassisligi bo‘yicha tahsil olgan 5 nafar bitiruvchi bakalavrlarga uzoq kutilgan diplomlari universitet rektori Aziz Abduhakimov tomonidan tantanali ravishda topshirildi.

Tadbir davomida bitiruvchilar va ularning ota-onalari O‘zbekistonda turizmga bo‘lgan talab yuqori ekanligini, o‘quv jarayonida dual ta’limning ahamiyati va har bir talabaga koʻrsatilgan individual yondashish muhimligini ta’kidlab, universitet o‘qituvchilari, bitiruv loyihalari rahbarlari va universitet ma’muriyatiga o‘z minnatdorchiliklarini bildirdilar.

Ta’kidlash joizki, tadbir tashkilotchilari, xususan, universitetning “Mahallabay yoshlar bilan ishlash va tadbirlarni tashkil etish” bo‘limi, O‘zbekiston Respublikasi Turizm va Madaniy meros vazirligi, Samarqand viloyati hokimligi, Samarqand viloyati Turizm va madaniy meros bosh boshqarmasi ko‘magida bayramona muhit yaratildi: tadbir davomida jonli simfonik musiqa ijro etildi, faol talabalar tantanali chiqishlar, turli teatrlashtirilgan tomoshalar bilan yigʻilganlarni dildan quvontirdi.

“Aziz do‘stlar, esda tutingki, bizning sevimli “Ipak yo‘li” turizm va madaniy meros xalqaro universiteti tarixi sizning muvaffaqiyatlaringizdan iborat. Faxr bilan aytaman: Universitetimiz yilnomasidan sizlarning ham oʻz sahifalaringiz mavjud. Kelajak avlodlarga ibrat boʻladigan yutuqlaringiz bilan ushbu sahifalarni toʻldirishni toʻxtamangiz. Biz sizlar bilan faxrlanamiz! Sizlarga omad tilaymiz, aziz bitiruvchilar! – ta’kidladi oʻz tabrik nutqida Universitet rektori Aziz Abduxakimov.

Joriy yilning 2-3-iyul kunlari “Sky Chess” shaxmat maktabi, O‘zbekiston Respublikasi Turizm va madaniy meros vazirligi hamda “Ipak yo‘li” turizm va madaniy meros xalqaro universiteti hamkorligida tezkor (rapid) shaxmat bo‘yicha turnir boʻlib oʻtdi. Musobaqalar “Ipak yo‘li” universitetida o‘tkazildi.

Turnirning umumiy sovrin jamgʻarmasi 10 000 000 soʻmni tashkil etdi. Turnirda “Sky Chess” maktabining Toshkent, Qarshi va Samarqand shaharlaridagi filiallari tarbiyalanuvchilari o‘zaro kuch sinashdi.

Bolalar va o‘smirlar o‘rtasida ichki turizmni rivojlantirish – musobaqaning maqsadlaridan biri bo‘lib, yosh shaxmatchilar ko‘hna Samarqand bilan yaqindan tanishish uchun ajoyib imkoniyatga ega bo‘ldi.

3-iyul kuni turnirning tantanali yopilish marosimi boʻlib oʻtdi. Tadbirda Turizm va madaniy meros vaziri o‘rinbosarlari – N. Zikrillayev va A. Eshtayevlar tantanali so‘zga chiqib, shaxmat musobaqalari navqiron avlod har tomonlama rivojlantirishda muhim ahamiyat kasb etishini ta’kidladilar. Bundan tashqari, turizm va madaniy meros sohalarida ta’lim va ilm-fanni rivojlantirish boʻyicha vazirining o‘rinbosari Alisher Eshtayev ta’kidlaganidek, ishtirok etgan yosh shaxmatchilar universitetga alohida qiziqish bildirmoqda va kelajakda, maktablarini bitirib, oʻqishlarini “Ipak yo‘li” universitetida davom ettirmoqchilar.

Hakamlar hay’ati g‘oliblarni pulli mukofot va esdalik sovg‘alari bilan taqdirladi. G‘oliblar ikki guruhga bo‘lingan. “A” guruhi g‘oliblari:

1-toifa:

1-o‘rin – Suyarov Muhammadzohid;

2-o‘rin – Obidov Biloliddin;

3-o‘rin – Obidjonov Ormet;

4-o‘rin – Attaev Aziz;

5-o‘rin – Rahmatullaev Muhammadsolih.

2-toifa:

1-o‘rin – Ahmedova Shahina;

2-o‘rin – Mansurova Mumtozbegim.

3-toifa:

1-o‘rin – Normurodov Ilhom.

«А» guruhi g‘oliblari

“B” guruhi g‘oliblari:

1-toifa:

1-o‘rin – Sattorov Aziz;

2-o‘rin – O‘ktamov Jaxongir;

3-o‘rin – Hakimi Anvar;

4-o‘rin – Xusnutdinova Xusnora;

5-o‘rin – Ro‘ziqulov Shoxruzbek.

2-toifa:

1-o‘rin – Sobirova Mumtozbegim;

2-o‘rin – Aziza Xusnutdinova.

3-toifa:

1-o‘rin – Sobirov Feruzbek.

«B» guruhi g‘oliblari

Tashkiliy qo‘mita tomonidan ta’kidlanganidek, turnir doimiy tus oladi va unga respublikaning barcha hududlaridan yosh shaxmatchilarni keng jalb etish rejalashtirilgan.

Joriy yilning 1-iyul kuni “Ipak yo‘li” turizm va madaniy meros xalqaro universiteti rahbariyati Turizm va madaniy meros vazirligi tomonidan onlayn formatida tashkil etilgan O‘zbekiston Respublikasi Konstitutsiyasiga o‘zgartirishlar kiritish masalalariga bag‘ishlangan yig‘ilishda ishtirok etdi.

Bugungi muhokamada vazirlik negizidagi barcha quyi tashkilotlar, kollej va texnikumlar ishtirok etdi.

Eslatib o‘tamiz, O‘zbekiston Respublikasi Prezidenti Shavkat Mirziyoyev Konstitutsiyaga o‘zgartirishlarni referendum yo‘li bilan qabul qilishni taklif qilgan edi.

“Komissiya taklifiga ko‘ra, Parlament tomonidan ishlab chiqilgan loyihani umumxalq muhokamasida ko‘rib chiqish va referendum yo‘li bilan qabul qilishni taklif etaman”, — dedi Prezident 20-iyun kuni Konstitutsiyaga oʻzgartirishlar kiritish boʻyicha maxsus komissiya a’zolari bilan bo‘lib o‘tgan yig‘ilishda.

Davlat rahbari konstitutsiyaviy islohotlar jamoatchilik fikri va O‘zbekiston xalqining qo‘llab-quvvatlashiga asoslanishi kerakligini ta’kidladi.