Yangiliklar: Dekabr 2023

Joriy yilning 19-dekabr kuni “Ipak yo‘li” turizm va madaniy meros xalqaro universiteti jamoasi va talabalari tomonidan yangi yil sovg‘alari yig‘ildi va Samarqand viloyati oliy ta’lim, fan va innovatsiyalar boshqarmasi huzuridagi Samarqand imkoniyati cheklangan shaxslar uchun ixtisoslashtirilgan kasb-hunar maktabi o‘quvchilariga  taqdim etildi. Yordam qilganlarga rahmat!

2023-yilning 20-dekabr kuni “Ipak yo‘li” turizm va madaniy meros xalqaro universiteti Xotin-qizlar maslahat kengashi raisi M.Abbasova tashabbusi bilan 1-kurs talabalari uchun ajoyib tadbir o‘tkazildi. Unga universitet psixologi D.Turdiyeva taklif etildi va u “Art-terapiya – ruhiyat malhami” nomli mahorat darsini namoyish etdi.

O‘quv-ishlab chiqarish markazining shinamgina kahvaxonasida tashkil etilgan tadbir samimiy, bayramona muhitda o‘tkazildi. D.Turdiyeva dastlab Art-terapiya haqida batafsil ma’lumot berib, uni insonning ruhiy va jismoniy salomatligiga bo‘lgan ijobiy ta’siri bilan o‘rtoqlashdi. Amaliy qismida talabalar o‘zlariga yoqqan shakllarni tanlab, ularni bo‘yashdi. Bu bilan talabalar doim tarqoq xolatda bo‘ladigan diqqatini jamlash, ijobiy energiyasini foydali tomonga yo‘naltirishni va o‘z ichki dunyosiga nazar solish imkoniga ega bo‘lishdi.   

Yoshlarni har tomonlama qo‘llab-quvvatlash davlatimiz olib borayotgan siyosatning ustuvor vazifalaridan biri hisoblanadi. Ma’lumki, “Ipak yo‘li” turizm va madaniy meros xalqaro universiteti rahbariyati doimiy ravishda oliygohimiz talaba-yoshlari bilan turli darajadagi uchrashuv va muloqotlar o‘tkazib kelmoqda.

 Joriy yilning 20-dekabr kuni “Ipak yo‘li” turizm va madaniy meros xalqaro universiteti Birinchi prorektori J.Eltazarovning “Rahbar va yoshlar” ochiq muloqoti tashkil etildi. Tadbirda universitetimizning kunduzgi va sirtqi ta’lim yo‘nalishlarida o‘qiyotgan talabalar bilan birgalikda prorektorlar va oliygoh professor-o‘qituvchilari ishtirok etishdi.

“Ipak yo‘li” turizm va madaniy meros xalqaro universiteti prorektorining talaba-yoshlar bilan o‘tkazayotgan bu kabi ochiq va samimiy muloqotlari ular uchun motivatsiya bo‘lish birgalikda, turli taklif va tashabbuslarni, muammolarni yechishga ham xizmat qiladi,-deydi universitetimizning fransiyalik o‘qituvchisi Darius Riaziy.

Ochiq va samimiy o‘tgan muloqotda talaba-yoshlar turizm sohasida ta’lim olishning istiqbollari va tadbirkorlikka oid turli takliflarni o‘rtaga tashladi. Universitet prorektori ham bu kabi tashabbuslar oliygoh ma’muriyati tomonidan doimiy ravishda qo‘llab-quvvatlanishi xususida gapirdi. Tadbirda talabalar uchun yana bir qulaylik davlat-xususiy sherikchilik asosida yotoqxona qurilib foydalanishga topshirilayotganligi bu mahalliy va xorijlik talabalar ayni muddao ekanligini ta’kidladi. Shuningdek tadbirda endilikda talaba-yoshlarning nazariya bilan amaliyotni o‘yg‘un ravishda olib borishlari uchun Turizm Akademiyasi faoliyati yo‘lga qo‘yilganligi va uning buguni va ertasi xususida fikrlar bildirdi. Tadbirda o‘quv yili davomida faol bo‘lgan talaba-yoshlarga diplom va esdalik sovg‘alari topshirildi.     

Ushbu yilning 20-dekabr kuni  respublika Oila va xotin-qizlar qo‘mitasi raisi O.A.Parpiboeva  rahbarligida  oliy ta’lim muassasalari xotin-qizlari uchun onlayn tarzda ochiq muloqot tashkil etildi.

Ochiq muloqotda  Samarqand viloyati markaziy studiyasidan  Samarqand viloyati oila va xotin-qizlar boshqarmasi xodimasi O.Abdurayimova, “Ipak yo‘li” turizm va madaniy meros xalqaro unversitetining xotin-qizlar kengashi raisi M.Abbasova, “Turizm menejmenti” fakulteti dekani R.Toshniyozova hamda “Qizlarjon” klubining iqtidorli talaba-qizlari ishtirok etib,  o‘zlarini qiziqtirgan savollari, taklif va mulohazalari bilan faol ishtirok etishdi.

Joriy 19-dekabr kuni oliygohimiz talabalari tomonidan “Ipak yo‘li savdosi mo‘jizalari” nomli qiziqarli teatrlashtirilgan tomosha namoyish etildi. Bu tomosha nafaqat talaba-yoshlarning ijodiy ishi, balki bo‘lg‘usi arxeologlarning usta guruhi tomonidan mohirlik bilan tashkil etilgan ta'lim ko'rgazmasi sifatida ham tashkil qilindi.

Ushbu teatrlashtirilgan tomoshalarda qadimdagi “Ipak yo‘li” bozorini o‘zida aks ettirganligi bilan ahamiyatli bo‘ldi.

Ma’lumki, pedagogikada talabalarga ma’lum bir voqelikni yetkazib berishda teatr tomoshalari ham muhim ahamiyat kasb etadi. Shu sababdan talabalar tomonidan tashkil qilingan tomoshada “Ipak yo‘li”ning jonli o‘tmishiga yana bir nazar tashlandi. Sahna ko‘rinishlari orqali tarixda Samarqanddan Xitoyning Sian shahrigacha bo‘lgan turli sivilizatsiyalar, savdo yo‘llari tarmog‘ining faoliyati namoyish qilindi.

Sanoqli kunlardan so‘ng yurtimizga yangi yil kirib keladi. Ushbu yangi yil bayrami munosabati bilan joriy yilning 18-dekabr kuni bayram tadbirlarini yuqori saviyada oʻtkazish dasturi ishlab chiqildi. Dastlab ushbu dastur asosida universitet bayramona bezatildi va talabalar uchun tadbirlar yuqori saviyada tashkil etish ishlari amalga oshirila boshlandi.

“Ipak yo‘li” turizm va madaniy meros xalqaro universiteti Talabalar Parlamenti tashabbusi bilan talaba-yoshlar uchun “Yangi yil qo‘shiqlari” karaoke tadbiri va “Yangi yil mafiyasi” intellektual o‘yini tashkil etildi.

Joriy yilning 19-dekabr kuni “Ipak yo‘li” turizm va madaniy meros xalqaro universiteti psixologi D.Turdiyeva tomonidan “Orzular xaritasi” nomli ajoyib aksiya o‘tkazildi.

Orzu-istaklaringiz amalga oshishini xohlaysizmi? Ularni albatta qog‘ozga tushiring! Gap shundaki, biz o‘z o‘y-fikrlarimizni yozayotganimizda, orzu-maqsadlarimizni qayd etayotganimizda butun diqqat-e’tiborimizni shunga qaratamiz. Diqqatimiz qayerda bo‘lsa, demak energiyamizni ham o‘sha yerga yo‘naltiramiz. Bu esa ularning amalga oshishi uchun eng katta kuch hisoblanadi.

Shu maqsadda, universitet jamoasi, talabalari ham kirib kelayotgan 2024 yilda amalga oshirishni rejalashtirgan orzu-maqsadlari, niyatlari, istaklarini yozib, orzular xaritasiga ilib qo‘yishdi. Diltortar musiqa ohanglari ostida o‘tgan ajoyib tadbir barcha ishtirokchilarga xushkayfiyat bag‘ishladi va bayram nafasini his etish imkonini berdi.

Joriy yilning 15-16 dekabr kunlari Sharof Rashidov nomidagi Samarqand Davlat universitetida “Raqamli iqtisodiyotda turizmni rivojlantirishning mintaqaviy xususiyatlari, shartlari va istiqbollari” mavzusida xalqaro ilmiy-amaliy konferentsiya bo‘lib o‘tdi. Ushbu konferensiyada universitetimiz prorektori Toni Zou “AI va Smart Destination: chegara nazariyalari va eng yaxshi amaliyotlar” mavzusida ma’ruza qildi. Toni Zou o‘z mar’uzasida AI texnologiyasidagi taraqqiyotni va uning turizm sohasida, ayniqsa turizm yo'nalishida qo'llanilishini ko'rib chiqdi va tadqiqot va ishlab chiqarish amaliyotini yaratish xususida o‘z fikrlarini bildirib o‘tdi.
Konferensiyada Samarqand viloyati hokimining o‘rinbosari Rustam Qobilov, Rossiya, Polsha, Tojikiston, Hindiston, Germaniya va O‘zbekiston olimlari ishtirok etdi.

Joriy yilning 18-dekabr kuni Samarqand Yoshlar markazida O‘zbekiston Respublikasi Prezidentining 2023-yil 14-dekabrdagi “O‘zbekiston Respublikasi Qurolli Kuchlari tashkil etilganligining 32 yilligini hamda Vatan himoyachilari kunini nishonlashga tayyorgarlik ko‘rish va o‘tkazish chora-tadbirlari to‘g‘risidagi F-79-sonli farmoyishining ijrosini ta’minlash maqsadida “Yangi O‘zbekiston armiyasi mamlakat qudrati, yuksak g‘urur va sadoqat timsolidir!” shiori asosida tashkil etilgan bayram tadbirida “Ipak yo‘li” turizm va madaniy meros xalqaro universiteti bir guruh xodimlari, tyutorlar hamda talabalar ishtirok etishdi.

Tadbirda namoyish etilgan harbiylar chiqishlari, ularning faoliyati bilan bog‘liq sahna ko‘rinishlari yig‘ilish ishtirokchilarida yuksak g‘urur va vatanga muhabbat tuyg‘ularini yanada kuchaytirishga xizmat qiladi.

Bayram tadbirida “Harbiy-vatanparvarlik oyli”gi doirasida 19-dekabrdan 27-dekabr kuniga qadar viloyatdagi harbiy qismlarda ochiq eshiklar kuni tashkil etilganligi e’lon qilinganligi universitetimizda tahsil olayotgan talabalar uchun quvonchli xabar bo‘ldi.

Yaqinda universitetimizga Pastdarg‘om tumanidagi Prezident maktabi  bitiruvchilari tashrif buyurishdi va oliygoh hayoti bilan yaqindan tanishish imkoniga ega bo‘ldi. O‘quvchilarda bu yerda yaratilgan shart-sharoit va imkoniyatlar juda katta qiziqish o‘yg‘otdi. Ayniqsa talabalar uchun auditoriyalarning zamonaviy tarzda jihozlanishi, turli tillardagi kitoblarga boy kutubxona o‘quvchilarning universitetimizga bo‘lgan qiziqishini yanada oshishiga xizmat qildi.