2025-yilning 9-11-oktyabr kunlari “Innoweek.Uz-2025” xalqaro innovatsion g‘oyalar haftaligi doirasida tashkil etilgan tadbirlarda universitet Ilmiy tadqiqotlar bo’limi boshlig’i Mansurova Nargiza Shamsidinovna ham mufavvaqiyatli ishtirok etdi. Poytaxtning CAEx majmuasida 15 ming kvadrat metr maydonda “Chegarasiz g‘oyalar” shiori ostida 180ga yaqin kompaniyalar, universitetlar va texnoparklardan 6 ta yo‘nalishda 400 dan ziyod yangi ishlanma, ilmiy yechim va texnologiyalar namoyish etildi. Shuningdek, qatnashchilar orasida Koreya, Xitoy, Germaniya, Malayziya, Yaponiya va Niderlandiyadan ishtirokchilar qatnashishdi. Haftalik davomida “XXI asr ilm-fani va biznesda ayollar: yutuqlar va muammolar” mavzusidagi xalqaro forum ham bo‘lib o‘tdi. Unda xorijlik ayol ekspertlar tomonidan O‘zbekistonda xotin-qizlar tadbirkorligi va ilm-faniga berilayotgan e’tibor haqida iliq fikrlar bildirildi. Shu bilan birga, Yevropadagi Horizon Europe dasturida ayollarga erkaklar bilan teng imkoniyatlar taqdim etilayotgani haqida taqdimotlar qilindi. Ayniqsa, ushbu dasturda o‘zbekistonlik ayol olimalarning faol ishtiroki alohida ta’kidlandi. Ular biotexnologiya, tibbiyot, iqlim o‘zgarishi va raqamli texnologiyalar sohasida xalqaro loyihalarda hamkorlik qilib, mamlakatning ilmiy salohiyatini namoyish etmoqdalar. Bu nafaqat O‘zbekiston ayol olimalarining xalqaro nufuzini oshirish, balki milliy ilm-fan maktablarini global ilmiy hamjamiyatga integratsiya qilishga xizmat qilmoqda. Yuqoridagilardan tashqari, N.Mansurovaning “Startaplarni qo‘llab-quvvatlash ekotizimini rivojlantirish: muammolar va imkoniyatlar” mavzusida plenar sessiya, “O‘zbekiston milliy innovatsion tizimini modernizatsiya qilish” mavzusida panel sessiya, “Innovatsion hududlar va texnoparklar – O‘zbekistonning barqaror rivojlanishi kaliti” mavzusida xalqaro forumlarda universitet nomidan ishtiroki ta’minlandi.