2026-yil 16-fevral kuni universitetimizda turizm va madaniy meros sohasi rahbarlari uchun beshinchi seminar tashkil etildi. Tadbirda O‘zbekiston Respublikasi Turizm qo‘mitasi Ta’lim boshqarmasi boshlig‘i Jahongir Matqarimov ma’ruzachi sifatida ishtirok etib, “2023–2025 yillarda turizm sohasidagi faoliyat va tarmoqni loyihaviy boshqaruv tizimiga o‘tkazishning kelgusi yo‘nalishlari” mavzusida taqdimot o‘tkazdi.
Jahongir Matqarimov o‘z ma’ruzasida 2023–2025 yillarda O‘zbekistonda turizmni rivojlantirish bo‘yicha erishilgan yutuqlar, asosiy ko‘rsatkichlar va amalga oshirilgan chora-tadbirlarga batafsil to‘xtalib o‘tdi. Shuningdek, mamlakat turizm sohasini loyihaviy boshqaruv tizimiga transformatsiya qilishning strategik yo‘nalishlari, asosiy vazifalari va mexanizmlari haqida so‘z yuritdi. Ma’ruzachi tomonidan O‘zbekistonning turizm sohasini sifatli va barqaror rivojlantirishga oid kelgusi rejalari ham taqdim etildi.
Taqdimot ishtirokchilarda katta qiziqish uyg‘otib, qizg‘in savol-javoblarga sabab bo‘ldi. Jahongir Matqarimov seminarda ishtirok etgan professor-o‘qituvchilar va talabalar bilan Ipak yo‘li turizmini rivojlantirish, turizmda loyihaviy boshqaruv tizimini shakllantirish hamda turizm ta’limida ishlab chiqarish, fan va ta’lim integratsiyasi kabi dolzarb mavzularda chuqur muhokamalar olib bordi va ishtirokchilarning savollariga atroflicha javob qaytardi.
Universitet prorektori, professor Toni Zou tomonidan boshqarilgan mazkur seminar YuNESKOning «Ipak yo‘li bo‘ylab barqaror madaniy meros turizmi» kafedrasi hamda «Journal of Silk Road Tourism Studies» ilmiy jurnali tomonidan qo‘llab-quvvatlandi. Tadbir Ipak yo‘li mamlakatlarida turizm va madaniy meros sohasidagi akademik va amaliy hamkorlikni mustahkamlash bilan birga, mintaqaviy turizmni sifatli rivojlantirish va kadrlar tayyorlash uchun yangi g‘oyalar berishga xizmat qildi.
