12-iyun kuni universitetimizda bitiruvchi talabalar uchun o‘z biznes g‘oyalarini amalga oshirish imkoniyatlariga bag‘ishlangan uchrashuv bo‘lib o‘tdi. Tadbir “Kelajakka qadam” dasturi doirasida tashkil etilgan bo‘lib, unda “O‘zmilliybank” AJ viloyati bosh boshqarmasi mas’ul xodimi ishtirok etdi. Uchrashuvdan asosiy maqsad – yoshlarni tadbirkorlik yo‘lida amaliy qo‘llab-quvvatlash, ularning biznes tashabbuslarini imtiyozli kreditlar, maxsus treninglar va zamonaviy bank xizmatlari orqali rag‘batlantirishdan iborat. Mutaxassis bitiruvchilarga o‘z loyihalarini ro‘yobga chiqarishda mavjud davlat dasturlari, kreditlash shartlari va tadbirkorlik ko‘nikmalarini rivojlantirish yo‘llari haqida batafsil ma’lumot berdi. Shuningdek, yoshlarni qiziqtirgan savollarga javob berilib, amaliy tavsiyalar taqdim etildi. Tadbir yakunida ta’kidlanganidek, bugungi kunga qadar jami 18 nafar bitiruvchi talabalar tomonidan loyihalar markazga taqdim etilgan bo‘lib, ulardan 16 tasi uchun bank tomonidan jami 200 million so‘m imtiyozli kredit rasmiylashtirilgan. Qolgan 2 ta loyiha bo‘yicha esa hujjatlar ko‘rib chiqilmoqda. Bunday uchrashuvlar yoshlarning tadbirkorlik salohiyatini ro‘yobga chiqarishda muhim omil bo‘lib xizmat qilmoqda.
