Prezidentimiz tashabbusi bilan amalga oshirilayotgan “Besh million sun’iy intellekt yetakchilari” loyihasi doirasida o‘tkazilgan “Milliy tanlov” g‘oliblarini tantanali taqdirlash marosimi bo‘lib o‘tdi.

Tadbirni Raqamli texnologiyalar vaziri Sh.Shermatov ochib berdi va yoshlarga zamonaviy bilim va ko‘nikmalarni egallashi uchun yaratilayotgan imkoniyatlar hamda raqamli texnologiyalar sohasida amalga oshirilayotgan izchil islohotlar haqida gapirdi.

Tadbirda 2025-yil yakunlariga ko‘ra, loyiha doirasida faol ishtirok etib, yuqori natijalarga erishgan o‘quvchilar, talabalar, pedagog xodimlar, ta’lim muassasalari hamda hamkor tashkilotlar rag‘batlantirildi.

Xususan, “Eng faol ishtirokchi” nominatsiyasi bo‘yicha “Ipak yo‘li” turizm va madaniy meros xalqaro universitetining 12 nafar talabasi g‘olib deb topilib, ular noutbuklar bilan taqdirlandi.

Mazkur yutuq universitetda talabalarni zamonaviy bilimlar bilan qurollantirish, ularning innovatsion salohiyatini rivojlantirish hamda raqamli texnologiyalar va sun’iy intellekt yo‘nalishlariga keng jalb etish borasida olib borilayotgan tizimli ishlarning muhim natijasi sifatida e’tirof etiladi. Barcha talabalarni ushbu muavaffaqiyat bilan muborakbod etamiz.