“Ipak yo‘li” xalqaro turizm va madaniy meros universitetida Qozog‘iston Respublikasining nufuzli oliy ta’lim muassasalaridan biri — Al-Farobiy nomidagi Qozoq milliy universiteti professor-o‘qituvchilari hamda talabalari tashrifi bo‘lib o‘tdi.
Tashrif doirasida mehmonlar universitet faoliyati, ta’lim jarayonlari, ilmiy-tadqiqot ishlari hamda xalqaro hamkorlik yo‘nalishlari bilan yaqindan tanishdilar. Shuningdek, tomonlar o‘rtasida akademik almashinuv dasturlari, qo‘shma ilmiy loyihalar va ta’lim sohasidagi hamkorlik istiqbollari yuzasidan fikr almashildi.
Mehmonlarga universitetning zamonaviy infratuzilmasi, o‘quv va ilmiy laboratoriyalari, kutubxona hamda talabalar uchun yaratilgan sharoitlar tanishtirildi. Shu bilan birga, yaqinlashib kelayotgan qabul jarayonlari, universitetda mavjud ta’lim yo‘nalishlari, xalqaro dasturlar, grant va stipendiya imkoniyatlari hamda talabalarga yaratilgan keng imkoniyatlar haqida batafsil ma’lumot berildi.
Mazkur tashrif ikki oliy ta’lim muassasasi o‘rtasidagi hamkorlik aloqalarini yanada mustahkamlash, professor-o‘qituvchilar va talabalar o‘rtasida tajriba almashish hamda yangi qo‘shma tashabbuslarni amalga oshirish uchun muhim qadam bo‘ldi.
