Universitetimizda 15–18-dekabr kunlari “Turizm va madaniy meros sohasini barqaror rivojlantirishda zamonaviy yondashuvlar” mavzusida I-Talabalar forumi muvaffaqiyatli tashkil etildi. Uch kun davom etgan mazkur forum doirasida kafedralar tomonidan ilmiy-amaliy konferensiyalar, turli ma’rifiy tadbirlar hamda ko‘rgazmalar o‘tkazildi.

Forumning eng muhim jihatlaridan biri — talabalarning faol ishtiroki bo‘ldi. Ular dolzarb mavzulardagi ilmiy maqolalar va innovatsion startap loyihalari bilan qatnashib, o‘z bilim va tashabbuslarini namoyon etdilar.

Talabalar forumi doirasida “Turizm va madaniy meros sohasini barqaror rivojlantirishda zamonaviy yondashuvlar” mavzusidagi ilmiy-amaliy konferensiya uchun maqolalar hamda startaplar tanlovi tashkil etildi. 18-dekabr kuni forum tashkilotchilari, faol ishtirok etgan professor-o‘qituvchilar, kafedra mudirlari hamda ushbu tanlov g‘oliblarini taqdirlash marosimi bo‘lib o‘tdi.

Tanlov natijalariga ko‘ra, 5 ta sho‘ba va startap yo‘nalishida g‘oliblar quyidagi tartibda mukofotlandilar:

1-o‘rin — 1 709 010 so‘m

2-o‘rin — 1 139 340 so‘m

3-o‘rin — 569 670 so‘m

Shuningdek, tanlovda faol ishtirok etgan barcha talabalar estalik sovg‘alari va sertifikatlar bilan taqdirlandilar.

Mazkur forum talabalarning ilmiy-ijodiy salohiyatini rivojlantirish, innovatsion g‘oyalarni qo‘llab-quvvatlash hamda turizm va madaniy meros sohasida zamonaviy yondashuvlarni targ‘ib etishda muhim ahamiyat kasb etdi.