Xitoyning Beihang universiteti Yangi media san’ati va dizayni maktabi dekani, professor Shen Syukunning taklifiga binoan universitetimiz prorektori Tongqian Zou Beihang universitetiga tashrif buyurdi. Tashrif davomida dekan Shen Syukun mehmonni Xitoy Ta’lim vaziri tashabbusi bilan tashkil etilgan Virtual reallik texnologiyalari va tizimlari bo‘yicha Milliy muhim laboratoriya faoliyati bilan yaqindan tanishtirdi. Shuningdek, VR texnologiyalarini mamlakat miqyosidagi muhim strategik texnologiyaga aylantirish borasida amalga oshirilayotgan ilg‘or tajribalar haqida atroflicha ma’lumot berildi.
Kampus bo‘ylab tashkil etilgan tanishuv sayohatidan so‘ng professor Tongqian Zou va dekan Shen Syukun Beihang universiteti hamda “Ipak yo‘li” turizm va madaniy meros xalqaro universiteti o‘rtasida qo‘shma ilmiy tadqiqotlar olib borish, professor-o‘qituvchilar almashinuvi, virtual reallik laboratoriyasini tashkil etish hamda talabalar tayyorlash yo‘nalishlarida hamkorlik istiqbollarini muhokama qildilar.
