2025-yil 20-aprel sanasida Pekin chet tillar universiteti (Beijing foreign studies university) rectori janob JIA Wenjian boshchiligidagi delegatsiya “Ipak yo‘li” turizm va madaniy meros xalqaro universitetiga tashrif buyurdi.
Tashrif davomida rasmiy uchrashuv tashkil etildi va asosiy mavzu— ikki tomonlama hamkorlikni kengaytirish, o‘zaro tajriba almashish va xalqaro miqyosdagi ta’lim va ilm-fan sohalarida strategik sheriklikni rivojlantirishdan iborat bo‘ldi hamda quyidagi asosiy hamkorlik yo‘nalishlari muhokama qilindi:
Professor-o’qituvchilar va talabalar mobilligi dasturlarini yo‘lga qo‘yish;
Qo‘shma ilmiy tadqiqotlar olib borish va akademik nashrlarni amalga oshirish;
Pekin chet tillar universitetida “O‘zbekshunoslik” kafedrasini tashkil etish va o‘zbek tilini o‘qitishni tizimli yo‘lga qo‘yish;
Har ikki universitet professor-o‘qituvchilari o‘rtasida akademik almashinuv dasturlarini joriy etish;
Ilmiy jurnallarni hamkorlikda chop etish va ilmiy konferensiyalarni birgalikda tashkil etish;
Xitoy tilini o‘rganayotgan talabalar uchun Pekin chet tillar universitetida doktorantura(PhD) bosqichi uchun grant (scholarship) dasturlarini yo‘lga qo‘yish.
Tashrif doirasida mehmonlar universitet kampusi hamda Samarqand turizm akademiyasi faoliyati bilan yaqindan tanishib, mavjud o‘quv xonalari, laboratoriyalar, ilmiy markazlar, zamonaviy infratuzilma va talabalarga yaratilgan shart-sharoitlar bilan tanishdilar.
Ma’lumot uchun: Pekin chet tillar universiteti Xitoydagi yetakchi xorijiy tillar universitetlaridan biri bo‘lib, 1941-yilda tashkil etilgan. Universitet Pekin shahrida joylashgan va Xitoyda eng ko‘p chet tillari o‘rgatiladigan oliy ta’lim muassasasi hisoblanadi. Ushbu universitetda o’zbek tilini o’qitish 2016-yildan yo’lga qo’yilgan. Pekin chet tillar universiteti tilshunoslik sohasida yuqori natijalarga ega bo‘lib, QS World University Rankings by Subject 2025 reytingida tilshunoslik bo‘yicha 18-o‘rinni va QS Osiyo universitetlari reytingida 330-o‘rinni egallagan.
