O‘zbekiston Repsublikasi Prezidentining 2024-yil 12-yanvardagi “Xorijiy davlatlarda O‘zbekiston tarixi va madaniyati, o‘zbek tili va adabiyotini o‘rganishni keng targ‘ib qilish orqali turistlar oqimini ko‘paytirish hamda mamlakatimiz nufuzini yanada oshirishga doir qo‘shimcha chora-tadbirlar to‘g‘risida”gi PQ-19-son qarorining 2-ilovasi 14-bandi ijrosini ta’minlash maqsadida “Ipak yo‘li” turizm va madaniy meros xalqaro universiteti “Tillar va global tadqiqotlar” kafedrasi mudiri, PhD, dots. v.b. To‘lqin Sultonov tomonidan joriy yilning 4-aprel kuni Qozog‘iston Respublikasi Turkiston shahrida joylashgan Xoja Ahmad Yassaviy nomidagi qozoq-turk xalqaro universitetida “O‘zbekiston va Qozog‘iston o‘rtasidagi tarixiy, madaniy va adabiy aloqalar” mavzusida ma’ruza tashkil etildi.
Tadbirda universitetning moliya va xalqaro aloqalar bo‘yicha prorektori Mustafa Giritliog‘lu, Turkologiya ilmiy-tadqiqot instituti direktor o‘rinbosari Mustafa Chetin, professor-o‘qituvchilar hamda doktorant, magistrant va talabalar ishtirok etdi.
Taqdimotda O‘zbekiston va Qozog‘istonning uzoq yillik mushtarak tarixi, madaniy meros va adabiy aloqalar bo‘yicha olib borilayotgan hamkorlik munosabatlari haqida batafsil ma’lumot berildi. Shuningdek, Xoja Ahmad Yassaviy nomidagi qozoq-turk xalqaro universiteti bilan hamkorlikda qisqa intensiv ma’ruzalar tashkil qilish, qo‘shma tadqiqotlar o‘tkazish, yosh tadqiqotchilarga o‘qish va tadqiqot olib borish imkoniyatini taqdim etish masalalarini muzokara qilish orqali ilmiy-tadqiqot va ta’lim dasturlarini kuchaytirishga kelishib olindi.
Ushbu ma’ruza Xoja Ahmad Yassaviy nomidagi qozoq-turk xalqaro universiteti professor-o‘qituvchilari, tadqiqotchilari va talabalarida boy taassurot qoldirdi.
