2026-yil 9-fevral kuni universitetimizda turizm va madaniy meros sohalari yetakchilari uchun to‘rtinchi seminar o‘tkazildi. Seminarga Xitoy Yoshlar Sayohat Xizmati (China Youth Travel Service) sobiq loyiha direktori, universitetimiz doktorantura talabasi Yang Jie xonim taklif etildi. U “Tematik parklarni boshqarish va faoliyatini yuritish” mavzusida Xitoydagi Maymun Podshohi tematik parki misolida ma’ruza qildi.

Yang Jie xonim Xitoydagi Huaguoshan manzarali hududida zamonaviy tematik parkni strategik rejalashtirish va boshqarish borasida erishilgan yutuqlarni taqdim etdi. U mavzu tanlash, hududiy rejalashtirish, mahsulotlar kombinatsiyasi, xizmatlar mosligi, byudjetni rejalashtirish hamda operatsion jarayonlarni loyihalash kabi masalalarni yoritib berdi. Ushbu ma’ruza talabalar va professor-o‘qituvchilar orasida katta qiziqish uyg‘otdi.

Ma’ruzachi va tinglovchilar madaniyat va turizm integratsiyasi orqali bozorni rivojlantirish, madaniy qadriyatlarni oshirish hamda turizm sohasini raqamlashtirish masalalari yuzasidan ham fikr almashdilar.

Seminar universitetimiz prorektori, professor Tongqian Zou rahbarligida o‘tkazildi hamda UNESCOning “Ipak yo‘li bo‘ylab barqaror meros turizmi” kafedrasi va “Ipak yo‘li turizm tadqiqotlari” ilmiy jurnali tomonidan qo‘llab-quvvatlandi.