O‘zbekiston Respublikasi Oliy ta’lim, fan va innovatsiyalar vazirligi hamda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasining 2025-yil 18-iyuldagi 39-sonli qo‘shma qaroriga asosan, “Ipak yo‘li” turizm va madaniy meros xalqaro universiteti qoshida “Yosh gidlar maktabi” qisqa muddatli o‘quv kursi tashkil etildi.
Bir oy davom etgan ushbu kurs oliy va kasbiy ta’lim tashkilotlari o‘quvchi hamda talabalari uchun mo‘ljallangan bo‘lib, unda jami 17 nafar yosh gid ishtirok etdi. Kursning asosiy maqsadi – yoshlarni qo‘llab-quvvatlash, ularni tajribali gidlar bilan “ustoz-shogird” an’anasi asosida amaliy ko‘nikmalarga o‘rgatish, shuningdek, yozgi ta’til davrini mazmunli o‘tkazishga ko‘maklashishdan iborat bo‘ldi.
Tantanali tarzda o‘tkazilgan bitiruv marosimida universitet rahbariyati, professor-o‘qituvchilar ishtirok etdilar. Tadbir davomida bitiruvchilarga kursni muvaffaqiyatli yakunlaganliklari haqida sertifikatlar topshirildi hamda ularning kelgusi faoliyatlari uchun zarur tavsiyalar berildi.
Mazkur loyiha yoshlarning kasbiy tayyorgarligini oshirish, turizm sohasida malakali kadrlar safini kengaytirish va milliy madaniy merosni targ‘ib etish yo‘lida muhim qadam bo‘ldi.
