Bugun, 19-dekabr kuni “Ipak yo‘li” turizm va madaniy meros xalqaro universiteti profilaktika inspektori Sh.Qurbonov va psixolog D.Turdiyeva Samarqand turizm va madaniy meros texnikumiga tashrif buyurib, “Bolalar huquqlari poymol qilinishiga qarshimiz!” mavzusida huquqiy-psixologik tadbir tashkil qilishdi.
Sh.Qurbonov O‘zbekiston qonunchiligida belgilangan bolalar haq-huquqlari borasida batafsil ma’lumot berib, o‘quvchi yoshlarning hayotning turli jabhalarida o‘zlarini qanday tutish kerakligi, har qanday qonunbuzarlik oqibatlari haqida gapirib o‘tdi. O‘z navbatida, profilaktika inspektori har bir bola davlat va qonun himoyasida ekanligini ta’kidladi.
Psixolog D.Turdiyeva esa o‘smirlik davriga xos ruhiyat olami, emotsional beqarorlik haqida gapirib, o‘zini namoyon qilishga yordam beruvchi texnikalarni amaliyotda sinab ko‘rdi. Insonning hissiyotlarini tushunishga va boshqarishga javob beruvchi emotsional intellekt to‘g‘risidagi trening ham juda samarali va foydali chiqish qildi.
Bundan tashqari, universitet va texnikum psixologi hamkorligida o‘quvchilar bilan individual ishlash uchun uchun har oyning bir kunini “Psixolog kuni” deb belgilash haqida kelishib olindi.
