Joriy yilning 18-fevral kuni “Ipak yo‘li” turizm va madaniy meros xalqaro universiteti faollar zalida mas’ullar, universitet faollari hamda 1-bosqich talabalari ishtirokida “Jaholatga qarshi ma’rifat” shiori ostida “Yoshlarni radikal aqidaviy oqimlar ta’siridan saqlash” mavzusida uchrashuv bo‘lib o‘tdi. Tadbirdan ko‘zlangan asosiy maqsad talabalar bilan ochiq muloqot o‘tkazish, ularning ilg‘or g‘oya va tashabbuslarini qo‘llab-quvvatlash, mavjud muammolarni birgalikda muhokama qilish hamda dolzarb masalalar yuzasidan fikr almashishdan iborat bo‘ldi. Uchrashuvda Samarqand viloyati Din ishlari bo‘yicha qo‘mitaning hududiy boshqarmasi rahbari Sohibnazar Boymurodov ishtirok etib, davlat va din munosabatlari, islom dinining asl insonparvarlik mohiyati, radikal va ekstremistik g‘oyalarning jamiyat taraqqiyotiga tahdidi hamda Prezidentimiz tomonidan ilgari surilayotgan “Jaholatga qarshi ma’rifat bilan kurashish” g‘oyasining globallashuv sharoitidagi ahamiyati haqida batafsil so‘z yuritdi. Tadbir davomida “jaholat” va “ma’rifat” tushunchalarining mazmuni, ularning tinchlik va barqarorlikni ta’minlashdagi o‘rni, yoshlarning mafkuraviy immunitetini mustahkamlash zarurati keng muhokama qilinib, islom dini niqobi ostida faoliyat yuritayotgan buzg‘unchi oqimlarning g‘ayriinsoniy ishlari aniq faktlar asosida ochib berildi, uchrashuv yakunida esa talabalarni qiziqtirgan savollarga mutaxassislar tomonidan batafsil javoblar berildi hamda mazkur tadbir yoshlar ongida sog‘lom dunyoqarashni shakllantirish yo‘lidagi muhim qadam ekani ta’kidlandi.