24-fevral kuni universitetimiz rektori Muhsinjon Xolmuxamedov Ko‘ksaroy qarorgohida Prezident Shavkat Mirziyoyevning yoshlar bilan bo‘lib o‘tgan muloqotida berilgan topshiriqlar ijrosiga bag‘ishlangan muhim yig‘ilishni o‘tkazdi. Mazkur uchrashuvda universitetda talaba-yoshlar bilan bevosita va yaqin hamkorlikda faoliyat olib boruvchi mas’ul xodimlar ishtirok etib, kun tartibidagi masalalar atroflicha muhokama qilindi.
Yig‘ilishda rektor M. Xolmuxamedov dastlab yoshlarning startap loyihalarini aniqlash, ularni har tomonlama qo‘llab-quvvatlash va bu jarayonlar uchun zarur bo‘lgan mablag‘larni o‘z vaqtida ajratish masalalariga alohida to‘xtaldi. Bu borada “Kelajakka qadam” dasturi doirasida tijorat banklari bilan hamkorlikni yo‘lga qo‘yib, talaba-yoshlarning biznes loyihalarini moliyalashtirish tizimini yaratish zarurligi ta’kidlandi. Shuningdek, har bir talaba bilan yakka tartibda, yaqindan muloqot olib borish, ularning muammo va takliflarini tinglash dolzarb vazifa etib belgilandi.
Prezidentimizning yoshlar bilan uchrashuvida ilgari surilgan yangi tashabbuslardan kelib chiqib, yig‘ilishda muhim qarorlar qabul qilindi. Xususan, har haftaning payshanba kuni Yoshlar kuni etib belgilanishi munosabati bilan universitetimizda ham aniq chora-tadbirlar ishlab chiqiladi. Endilikda mas’ul xodimlar tomonidan haftaning har payshanba kuni talabalar bilan faol tarzda ish olib borish, ularning taklif va ehtiyojlarini o‘rganish tizimi yo‘lga qo‘yiladi.
Bundan tashqari, universitetda turizm sohasidagi tadbirkorlik subyektlari bilan ochiq muloqot doirasida qator uchrashuvlar tashkil etilishi rejalashtirildi. Bu esa talabalarning amaliy ko‘nikmalarini oshirish va ularni real ishlab chiqarish jarayonlariga yaqinlashtirishga xizmat qiladi.
Yig‘ilishning yana bir muhim yangiligi — universitetda talaba-yoshlarni o‘z atrofiga birlashtiruvchi va biznes loyihalarini yo‘lga qo‘yishda amaliy ko‘makchi bo‘ladigan “Mening birinchi kasbim” loyihasi doirasida “Biznes inkubator”ning tashkil etilishi bo‘ldi. Mazkur inkubator yosh tadbirkorlarning dastlabki qadamlarini mustahkamlash va ularning g‘oyalarini amalga oshirishga ko‘maklashadi.
Shuningdek, yig‘ilishda universitetning Talabalar turar joyida istiqomat qilayotgan talabalar uchun zarur shart-sharoitlarni yanada yaxshilash, ularning dam olishi va ta’lim olishi uchun qulay muhit yaratish masalasiga ham alohida e’tibor qaratildi. Talabalar o‘rtasida ma’naviy-ma’rifiy va sport tadbirlarini doimiy ravishda o‘tkazish, ularning bo‘sh vaqtini mazmunli tashkil etish lozimligi ta’kidlandi.
Berilgan topshiriqlarning o‘z vaqtida va sifatli ijro etilishi universitetimiz talabalarining yangi yutuqlariga zamin yaratadi.
