2025-yil 23–25-oktabr kunlari Turkiyaning Denizli shahrida “Ipak yo‘li” turizm va madaniy meros xalqaro universiteti hamda Pamukkale universiteti hamkorligida xalqaro ilmiy-amaliy konferensiya boshlandi.

Tadbir ochilishida O‘zbekiston va Turkiya davlat madhiyalari yangradi. Shundan so‘ng, O‘zbekiston Respublikasi ekologiya, atrof-muhitni muhofaza qilish va iqlim o‘zgarishi vaziri, “Ipak yo‘li” turizm va madaniy meros xalqaro universiteti rektori Aziz Abduxakimovning video tabrigi ishtirokchilarga namoyish etildi.

Pamukkale universiteti rektori, professor Mahmud Güngör so‘zga chiqib, ilmiy hamkorlik, madaniy merosni asrash va turizmni rivojlantirish masalalari yuzasidan o‘z fikrlarini bildirdi. Shundan so‘ng, Pamukkale universiteti talabalari tomonidan turk xalq musiqa konserti, xalq raqslari, turk oshxonasi pazandalik tanlovi hamda turk qahvasi ustaxonasi taqdimoti namoyish etildi.

Konferensiya doirasida Hierapolis, Tirapolis va Laodikya sho‘balarida sessiyalar o‘tkazildi. Tadbirda O‘zbekiston, Turkiya, Qozog‘iston, Qoraqalpog‘iston va Ozarbayjondan jami 100 dan ortiq olim o‘z ma’ruzalari bilan qatnashdi.

Tadbir davomida turkiy dunyoning qadriyatlari, tili, adabiyoti, tarixi hamda turizm sohalarida madaniy merosni saqlash va rivojlantirish masalalari muhokama qilindi. Konferensiya dasturidan, shuningdek, Denizli shahridagi diqqatga sazovor joylarga sayohatlar ham o‘rin oldi.