Universitetda birinchi prorektor D. Nasimov ishtirokida talabalar bilan ochiq va mazmunli uchrashuv bo‘lib o‘tdi. Samimiy ruhda tashkil etilgan tadbirda talabalar hayoti va ularning xavfsizligiga doir muhim masalalar muhokama qilindi. Xususan, kuz-qish mavsumida is gazidan foydalanishda xavfsizlik qoidalariga qat’iy amal qilish, shaxsiy ehtiyotkorlikni oshirish hamda o‘quv mashg‘ulotlarini qoldirmaslik zarurligi ta’kidlandi.
Shuningdek, uchrashuv davomida universitetda talabalar uchun yaratilgan xalqaro almashinuv dasturlari, nufuzli loyihalar va ularda ishtirok etish imkoniyatlari haqida atroflicha ma’lumot berildi. Birinchi prorektor talabalarni o‘z mutaxassisliklari bo‘yicha ish bilan band qilishga qaratilgan amaliy dasturlar, stajirovka va mehnat bozoriga tayyorlash mexanizmlari haqida ham to‘xtalib o‘tdi.
Tadbir yakunida talabalarni qiziqtirgan savollar yuzasidan ochiq muloqot tashkil etildi. Faol ishtirok etgan talabalar o‘z taklif va mulohazalarini bildirib, tegishli javob va tavsiyalar olish imkoniyatiga ega bo‘ldilar.
