30-aprel kuni Samarqand tumanining “Oq bo‘yro” dam olish hududida viloyat hokimligi, Turizm boshqarmasi hamda “Ipak yo‘li” turizm va madaniy meros xalqaro universiteti hamkorligida “Ento festival” tashkil etildi.
Festivalda xalqimizning urf-odatlari va an’analarini aks ettiruvchi turli xil milliy o‘yinlar, xalq og‘zaki ijodi namunalari va folklor-etnografik jamoalar o‘z chiqishlarini namoyish qildi. Bahoriy kayfiyat va yam-yashil tog‘ yon bag‘ri har bir ishtirokchiga o‘zgacha ruh bag‘ishladi.
Tadbirda universitet talabalari faol ishtirok etdi. Mahalliy va xorijlik yoshlar milliy liboslarda o‘z qadriyatlarini tomoshabinlarga namoyish qilishdi. Shuningdek, ishtirokchilar paraplanda uchish, turli sport o‘yinlarida ishtirok etish imkoniga ega bo‘ldi. Jo‘shqin kuylar va qo‘shiqlar festivalning yuksak kayfiyatda o‘tishiga xizmat qildi.
