Universitetimizda 1-bosqich talabalari ishtirokida “Talabalar va psixolog uchrashuvi” doirasida psixologik trening bo‘lib o‘tdi. Mazkur uchrashuvning asosiy maqsadi — talabalarning ichki dunyosini yanada chuqurroq anglash, ularning his-tuyg‘ulari, o‘qish jarayonidagi holati hamda motivatsiya darajasini aniqlash va mustahkamlashdan iborat edi.
Trening davomida talabalar o‘zlarini erkin his etishlari, o‘z fikrlarini ochiq ifoda etishlari, bir-birlarini diqqat bilan tinglash va tushunish ko‘nikmalarini rivojlantirishga alohida e’tibor qaratildi. Mashg‘ulotlar jarayonida har bir ishtirokchi o‘z fikr va hissiyotlarini bemalol bayon etish, o‘zaro samimiy muloqotda bo‘lish imkoniga ega bo‘ldi.
Psixolog D. Turdiyeva uchrashuvni iliq va samimiy ruhda olib bordi. U talabalarga hayotiy motivatsiyani oshirish, ijobiy fikrlashni shakllantirish va o‘zini anglash yo‘lida muhim tavsiyalar berdi.
Bunday uchrashuvlar talabalar uchun nafaqat ruhiy yengillik manbai, balki o‘zini rivojlantirish, ijobiy fikrlash hamda jamoada samarali muloqot qilish ko‘nikmalarini mustahkamlash yo‘lida muhim qadamlardan biri hisoblanadi.
