O‘zbekiston Respublikasi Prezidentining 2023-yil 26-apreldagi PQ-135-sonli qarori ijrosini ta’minlash hamda talaba-yoshlarni turizm qishloqlari hayoti bilan yaqindan tanishtirish maqsadida universitetimizning bir guruh mahalliy va xorijlik faol talabalari bilan birga “Qishloqda bir kun” loyihasi doirasida Urgut tumani hududidagi Tersak turizm qishlog‘iga amaliy sayohat tashkil etildi. Talabalarga dastlab tashkilotchilar tomonidan Tersak qishlog‘ining tarixi hamda turistlarni jalb qilish uchun asosiy mezonlar haqida ma’lumotlar berildi. Shundan so‘ng Tersak turizm qishlog‘ida o‘tkazilgan bir kun mahalliy va xorijiy talabalarga qishloq hayoti bilan yaqindan tanishish imkonini berdi. Talabalar tongni qishloqda tayyorlangan qaymoq va asal choyi bilan boshlashdi, tandirda non yopishdi. Qishloq xotin-qizlari bilan birgalikda milliy taomlar tayyorlab, ochiq osmon ostida dasturxon atrofida jam bo‘lib haqiqiy qishloq hayotini his qilishdi. Bunday loyihalar talabalarga turizm qishloqlari haqidagi tushunchalarini boyitishi bilan birga, Urgut tumani Tersak turizm qishlog‘ining turizm salohiyatini targ‘ib qilishda ham muhim ahamiyat kasb etadi.
