O‘zbekiston Repsublikasi Prezidentining 2024-yil 12-yanvardagi “Xorijiy davlatlarda O‘zbekiston tarixi va madaniyati, o‘zbek tili va adabiyotini o‘rganishni keng targ‘ib qilish orqali turistlar oqimini ko‘paytirish hamda mamlakatimiz nufuzini yanada oshirishga doir qo‘shimcha chora-tadbirlar to‘g‘risida”gi PQ-19-son qarori ijrosini ta’minlash maqsadida joriy yilning 4-aprel kuni Qozog‘iston Respublikasi Turkiston shahrida joylashgan Xoja Ahmad Yassaviy nomidagi qozoq-turk xalqaro universitetida “Ipak yo‘li” turizm va madaniy meros xalqaro universitetining “O‘zbekshunoslik” kafedrasi tashkil etildi.
“Ipak yo‘li” turizm va madaniy meros xalqaro universiteti “Tillar va global tadqiqotlar” kafedrasi mudiri To‘lqin Sultonov hamda kafedra katta o‘qituvchisi Farrux Sattarov Qozog‘istonning Turkiston shahrida joylashgan Xoja Ahmad Yassaviy nomidagi qozoq-turk xalqaro universitetiga tashrif buyurdi. Safar davomida universitet rektori Dr. Janar Temirbekova, universitetning moliya va xalqaro aloqalar bo‘yicha prorektori Mustafa Giritliog‘lu, Turkologiya ilmiy-tadqiqot instituti direktor o‘rinbosari Mustafa Chetin va boshqa mas’ullar bilan uchrashuv o‘tkazildi. Unda ikki universitet vakillari kelishuvi asosida ochilayotgan “O‘zbekshunoslik” kafedrasi faoliyatini qo‘llab-quvvatlash masalalari ko‘rib chiqildi.
Tomonlar kafedraning O‘zbekiston tarixi va madaniyati, o‘zbek tili va adabiyotini Qozog‘iston Respublikasida keng targ‘ib qilishda muhim o‘rin egallashiga umid bildirdilar.
“O‘zbekshunoslik” kafedrasiga “Ipak yo‘li” turizm va madaniy meros xalqaro universiteti tomonidan O‘zbekiston tarixi va madaniyati, o‘zbek tili va adabiyoti, turizm va madaniy merosga oid 200 dan ortiq kitob va albomlar, o‘zbek xalq amaliy san’ati namunalari, o‘zbek madaniyati, adabiyoti va ta’lim taraqqiyotiga hissa qo‘shgan ulug‘ siymolarning portretleri sovg‘a qilindi.
