Bugun, 26-fevral universitet rektori Muhsinjon Xolmuxamedov Talabalar turar joyida istiqomat qilayotgan talaba-yoshlar bilan samimiy muloqot o‘tkazdi.

Uchrashuv davomida rektor O‘zbekiston Respublikasi Prezidentining Ko‘ksaroy qarorgohida yoshlar bilan bo‘lib o‘tgan muloqoti hamda unda ko‘tarilgan dolzarb masalalarga to‘xtaldi. Xususan, davlatimiz rahbari tomonidan har haftaning payshanba kunini “Yoshlar kuni” deb e’lon qilinishi va yoshlarni har tomonlama qo‘llab-quvvatlashga qaratilgan amaliy tashabbuslarini universitetimiz talabalari hayotiga ham tatbiq qilinishi xususida gapirdi.

Talabalar turar joyida o‘tkazilgan uchrashuvda talaba-yoshlarning orzu-intilishlari, kundalik turmush tarzi va ta’limdagi yutuqlari bilan yaqindan qiziqdi. Bugungi kunda Talabalar turar joyida “Zakovat” intellektual klubi, yigitlar uchun tashkil etilgan mini futbol stadioni, “Mohir qo‘llar” to‘garagi faoliyat ko‘rsatib kelmoqda. Rektor tomonidan bu kabi to‘garaklar faoliyatini yanada kengaytirish maqsadida talabalar uchun birinchi bosqichda stol tennisi va badminton maydonchasini yo‘lga qo‘yilishi belgilandi.

Ma’lumot uchun, hozirda universitetning Talabalar turar joyida 400 nafarga yaqin mahalliy va xorijiy talabalar istiqomat qilmoqda. Ular uchun barcha zarur sharoitlar yaratilgan. Oshxona, ma’naviyat zali hamda zamonaviy maishiy texnika vositalari talabalar xizmatiga tayyor. Tashrif davomida rektor talabalarning dam olish xonalarini ham ko‘zdan kechirdi.

Samimiy ruhda o‘tgan uchrashuvda talabalar tomonidan bildirilgan taklif va tashabbuslar doimiy ravishda qo‘llab-quvvatlanib, zarur shart-sharoit va imkoniyatlar yaratilib berilishi aytildi.