30-oktabr kuni Samarqand davlat universitetida O‘zbekiston va Yaponiya universitetlari rektorlari ishtirokida forum o‘z ishini boshladi. Ushbu nufuzli anjuman ikki davlat oliy ta’lim muassasalari o‘rtasidagi hamkorlikni yanada mustahkamlash va yangi ilmiy-ta’lim loyihalarini yo‘lga qo‘yish nuqtayi nazaridan muhim ahamiyat kasb etmoqda. Bugun, 31-oktabr kuni forumning ikkinchi kuni doirasida “U2U” (University to University) formatidagi uchrashuvlar tashkil etildi. Mazkur uchrashuvlarda “Ipak yo‘li” turizm va madaniy meros xalqaro universiteti ma’muriy masalalar bo‘yicha birinchi prorektori D. Nasimov Yaponiyaning Nagoya iqtisodiyot universiteti, Toyo universiteti, Yamagata universiteti va boshqa yetakchi universitetlar rahbarlari bilan ikki tomonlama hamkorlik aloqalarini yo‘lga qo‘yish masalalarida muzokaralar olib bordi. Tomonlar o‘zaro fikr almashar ekan, turizm va madaniy meros yo‘nalishida kadrlar tayyorlash, professor-o‘qituvchilar hamda talabalar almashinuvi, qo‘shma ta’lim dasturlari va ilmiy loyihalarni amalga oshirish bo‘yicha o‘zaro manfaatli hamkorlikni rivojlantirishga tayyor ekanliklarini bildirdilar. Mazkur forum O‘zbekiston va Yaponiya o‘rtasidagi ta’lim, fan va madaniyat sohalaridagi aloqalarni yangi bosqichga ko‘tarishda muhim qadam bo‘lib xizmat qilmoqda.
