2026-yil 13-iyul kuni “Ipak yo‘li” turizm va madaniy meros xalqaro universitetida sirtqi ta’lim shaklini muvaffaqiyatli tamomlagan bitiruvchilar uchun tantanali bitiruv marosimi bo‘lib o‘tdi.
Tadbirni universitetning Ma’muriy masalalar bo‘yicha birinchi prorektori Dilmurod Nasimov ochib berdi. U dastlab universitet rektori Muhsinjon Xolmuxamedovning sirtqi ta’lim bitiruvchilariga yo‘llagan samimiy tabrigini o‘qib eshittirdi. Tabrikda bitiruvchilarning ta’lim olish yo‘lida ko‘rsatgan intilishi, mehnatsevarligi va kasbiy kamolot sari bosib o‘tgan yo‘li alohida e’tirof etilib, ularga kelgusidagi faoliyatlarida ulkan muvaffaqiyatlar, mustahkam sog‘liq va yangi zafarlar tilangan edi.
Shundan so‘ng Dilmurod Nasimov bitiruvchilarni oliy ta’limni muvaffaqiyatli tamomlaganliklari bilan samimiy tabriklab, sirtqi ta’lim mehnat faoliyati bilan bir qatorda bilim va kasbiy salohiyatni oshirishda muhim o‘rin tutishini ta’kidladi.
Shuningdek, marosimda Samarqand viloyati hokimining o‘rinbosari Rustam Qobilov ham so‘zga chiqib, bitiruvchilarni ushbu quvonchli kun bilan tabrikladi. U sirtqi ta’lim yo‘nalishida talabalarga dars bergani o‘z faoliyatidagi muhim tajribalardan biri bo‘lganini qayd etar ekan, bitiruvchilarning o‘qish davomidagi intilishi, bilimga chanqoqligi va mas’uliyatini alohida e’tirof etdi. Shuningdek, egallagan bilim va ko‘nikmalarini amaliy faoliyatda samarali qo‘llab, yurtimiz taraqqiyotiga munosib hissa qo‘shishlariga ishonch bildirdi.
Ma’lumotlarga ko‘ra, joriy yilda universitetning sirtqi ta’lim shaklini jami 114 nafar talaba muvaffaqiyatli tamomladi.
Marosim davomida bitiruvchilar nomidan so‘zga chiqqan talabalar universitetda tahsil olgan yillar davomida egallagan nazariy bilimlari, amaliy tajribalari hamda professor-o‘qituvchilarning ko‘magi ularning kasbiy va shaxsiy rivojlanishida muhim o‘rin tutganini ta’kidladilar. Shuningdek, ular universitet rahbariyati, professor-o‘qituvchilar va barcha jamoaga yaratilgan shart-sharoitlar hamda ko‘rsatilgan e’tibor uchun samimiy minnatdorlik bildirdilar.
Ko‘tarinki ruhda, quvonch va unutilmas lahzalarga boy tarzda o‘tgan bitiruv marosimi barcha ishtirokchilarda yorqin taassurot qoldirdi. Tadbir yakunida bitiruvchilarga diplomlar tantanali ravishda topshirilib, ularning kelgusidagi kasbiy faoliyatida ulkan muvaffaqiyatlar tilandi.
Universitet jamoasi sirtqi ta’lim bitiruvchilarini ushbu muhim hayotiy bosqichni muvaffaqiyatli yakunlaganliklari bilan samimiy muborakbod etadi hamda ularga kasbiy faoliyatida yuksak marralar, mustahkam sog‘liq va ulkan zafarlar tilaydi.
