Talabalar uchun LinkedIn hamda career.edu.uz platformalari imkoniyatlari mavzusida uchrashuv oʻtkazildi

Bugungi raqamli asrda va keskin raqobat muhitida faqatgina nazariy bilimlar bilan cheklanish yetarli emas. Zamonaviy mehnat bozorida oʻz oʻrniga ega boʻlishni istagan har bir talaba shaxsiy brendini shakllantirishi va toʻgʻri professional aloqalar tarmogʻini (networking) qura olishi lozim.

Aynan shu maqsadda, joriy yilning 12-iyun kuni universitetimizda talaba yoshlar uchun dunyodagi eng yirik professional ijtimoiy tarmoq hisoblangan LinkedIn platformasidan samarali foydalanish va undagi imkoniyatlar hamda vazirlik tomonidan taqdim etilgan career.edu.uz platformasidan roʻyxatdan oʻtishga bagʻishlangan seminar-trening tashkil etildi.

Tadbir interaktiv tarzda, savol-javoblar va amaliy mashgʻulotlar shaklida oʻtdi. Seminar davomida talabalar quyidagi muhim yoʻnalishlar boʻyicha master-klass oldilar:

Profilni toʻgʻri optimallashtirish

Profil sarlavhasi (Headline), «Oʻzim haqimda» (About) boʻlimlarini kalit soʻzlar asosida qiziqarli toʻldirish, professional surat joylashtirish sirlari.

Networking (Aloqalar oʻrnatish)

Oʻz sohasi boʻyicha mahalliy va xalqaro ekspertlar, kompaniya rahbarlari va kadrlar boʻyicha menejerlar (HR) bilan qanday qilib toʻgʻri va madaniyatli aloqa oʻrnatish strategiyalari.

Kontent yaratish

Profilni faol ushlab turish uchun sohadagi yangiliklar, yutuqlar va loyihalar haqida postlar yozish hamda shaxsiy brendni koʻtarish.

Yashirin ish oʻrinlarini topish

Vakansiyalar boʻlimidan unumli foydalanish, filterlar orqali maqsadli kompaniyalarni kuzatish va amaliyot (internship) dasturlariga ariza topshirish.