2025-yilning 11-oktabr sanasida “Ipak yo‘li” turizm va madaniy meros xalqaro universiteti talabalari uchun Buxoro viloyatining boy tarixiy va madaniy merosi bilan yaqindan tanishish maqsadida amaliy sayohat tashkil etildi. Sayohat davomida talabalar avvalo Buxoro shahrining eng mashhur ziyoratgohlaridan biri bo‘lgan Bahouddin Naqshband me’moriy majmuasini ziyorat qilishdi. Bu yerda ular Naqshbandiya tariqatining asoschisi Bahouddin Naqshband hayoti va faoliyati bilan tanishib, majmuadagi maqbara, masjid va boshqa diniy inshootlar haqida ma’lumot olishdi.

Shuningdek, talabalar qadimiy shaharning yuragi hisoblangan Ark qal’asini ham borib ko‘rishdi. Qal’a devorlari, ichki hovlilari, qabulxonalar va qamoqxona kabi tarixiy inshootlar o‘quvchilarda katta taassurot qoldirdi. Sayohatning navbatdagi manzili sifatida Labi Hovuz majmuasida talabalar XVII asrga oid tarixiy inshootlar, ularning qurilish uslublari va madaniy ahamiyati haqida batafsil ma’lumotlarga ega bo‘lishdi.

Bundan tashqari, talabalar Buxoro shahrining tarixiy markaz qismini piyoda kezib ko‘plab madrasalar, masjidlar, karvonsaroylar va bozorlardan iborat tarixiy obidalar – Ko‘kal-dosh madrasasi, Mir Arab madrasasi, Mag‘oki Attor masjidi kabi yodgorliklarni katta qiziqish bilan tomosha qilishdi. Sayohat yakunida talabalar Sitora Mohi Xosa – Buxoro amirlarining yozgi saroyi bilan tanishib, XIX–XX asr boshlaridagi amirlik saroy madaniyati haqida chuqurroq tasavvurga ega bo‘lishdi.