“Ipak yo‘li” turizm va madaniy meros xalqaro universitetining ilmiy tadqiqotlar va innovatsiyalar bo‘yicha prorektori Tongqian Zou so‘nggi uch yil davomida universitetimizda fidokorona mehnat qilib, ta’lim-tarbiya jarayonini takomillashtirish, ilmiy izlanishlar samaradorligini oshirish va xalqaro hamkorlikni kengaytirish yo‘lida salmoqli hissa qo‘shib kelmoqda.
Toni Zou ekologiya, gidrometeorologiya, turizm va boshqa sohalar bo‘yicha Xitoyning yetakchi olim hamda mutaxassislarini O‘zbekistonga jalb etish, o‘zaro ilmiy aloqalarni rivojlantirishda alohida faollik ko‘rsatgan.
Ushbu fidokorona xizmatlari va O‘zbekiston–Xitoy ilmiy hamkorligini mustahkamlash yo‘lidagi sa’y-harakatlari yuksak e’tirof etilib, O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri tomonidan jamoatchilik asosidagi xorijiy konsultant etib tayinlandi.
Universitet jamoasi nomidan janob Toni Zouni ushbu mas’uliyatli lavozim bilan chin dildan tabriklaymiz va kelgusidagi faoliyatlarida yanada ulkan muvaffaqiyatlar tilaymiz!
