Samarqandda o‘tayotgan, yo‘qolib ketish xavfi ostidagi yovvoyi fauna va flora turlari bilan xalqaro savdoni tartibga solishga bag‘ishlangan CITES Konvensiyasi Tomonlar konferensiyasining 20-sessiyasi (CITES CoP20) doirasida “Samarqand – 2025” IV Xalqaro haykaltaroshlik simpoziumi o‘zgacha ruhda davom etmoqda. “Bizning sayyoramiz – bizning uyimiz!” shiori ostida tashkil etilgan ushbu nufuzli san’at bayrami o‘ziga xos ijodiy maydonga aylandi. “Ipak yo‘li” turizm va madaniy meros xalqaro universitetining iqtidorli talabalari simpozium jarayonlari bilan yaqindan tanishar ekan, ular dunyo haykaltaroshlik maktablarining rang-barang uslublari, san’at va tabiat uyg‘unligini o‘zida mujassam etgan yondashuvlarni bevosita ko‘zlari bilan ko‘rdilar. Dunyoning o‘nga yaqin davlatidan tashrif buyurgan mashhur haykaltaroshlar tanlab olingan 12 ta eskiz asosida granit toshga jon bag‘ishlamoqda. Mazkur eskizlar 150 nafar haykaltarosh tomonidan taqdim etilgan 300 dan ortiq ishlanmalar orasidan eng sara namunalar sifatida tanlab olinganligi bilan alohida ahamiyatga ega.
