Talabalar forumining 3-kuni tadbirlari doirasida ko‘rgazma tashkil qilindi.
17-dekabr kuni “Muzey ekspozitsiyalarini yaratilishida tarix va kelajak” nomi ostida o‘tkazilgan taqdimot tashrif buyuruvchilarni ajablantirmasdan qo‘ymadi.
Forumda O‘zbekiston, Misr, Xitoy, Rossiya, Hindiston, Indoneziya, Pokiston, Turkiya, AQSH va Qozog‘istonlik magistr talabalar o‘z milliyligidan va urf-odatlaridan kelib chiqib o‘z shaxsiy ko‘rgazmalarini namoyish qilishdi.
2025-yil 17-dekabr kuni “Ipak yo‘li” turizm va madaniy meros xalqaro universitetida I–Talabalar forumi doirasida ko‘rgazma tashkil qilindi. Tadbirni “Tarix va madaniy meros” kafedrasi mudiri O. Boynazarov kirish so‘zi bilan ochib, yoshlarni milliy qadriyatlarga hurmat ruhida tarbiyalash zarurligini ta’kidlab, madaniyatlararo bag‘rikenglik tamoyili ko‘rgazmaning mazmun-mohiyati ekanligi xususida gapirdi.
Ko‘rgazma davomida universitet rahbariyati, kafedraning professor-o‘qituvchilari, murabbiylar, tyutorlar va talabalar faol ishtirok etdi.
“Non — o‘zbek mehmondo‘stligi ramzi” ko‘rgazmasi
Talabalar tomonidan pishirilgan non mahsulotlari, ularning genezisi, hatto haqiqiy tandirning o‘rnatilishi tarixiy meros uyg‘unligini namoyon etdi.
Misr milliy “Koshariy” ko‘rgazmasi
UNESCO jahon madaniyati durdonalari ro‘yxatiga kiritilgan Koshariy taomi tarixi va uni tayyorlanish jarayoni, turli hududlarga xos uslublarda tortiq etilishi barchani hayratda qoldirdi, tomoshabinlarga milliy madaniyat ruhi yetkazildi.
Xitoy milliy liboslari tarixi
Xan sulolasi davridan urfga aylangan va bugungacha e’zozlab kelinayotgan Xitoy liboslari atributlari hammani hayratlantirdi.
“Ijrodagi buyumlar” ko‘rgazmasi
Talabalar bilim, mantiq va jamoaviylikda o‘z qobiliyatlarini namoyon etdi. Rossiya va Qozog‘istonlik talabalar teatr sahnasi jihozlari tarixini o‘z ko‘rgazmalarida gavdalantirdi.
Bundan tashqari, o‘zbek milliy shirinliklari, Xitoy achchiq taomlari, o‘zbek-xitoy yodgorliklaridagi o‘xshashliklar kabi ko‘rgazmalar ham tomoshabinlarni befarq qoldirmadi.
