Joriy yilning 31-may kuni “Ipak yoʻli” turizm va madaniy meros xalqaro universiteti Xotin-qizlar kengashi raisi M.Abbasova tashabbusi bilan talabalar turar-joyida istiqomat qilayotgan yigitlar oʻrtasida “Oila va Vatan oldidagi masʼuliyatim” mavzusida davra suhbati tashkil etildi. Tadbirda “Turizm menejmenti” fakulteti dekani R.Toshniyozova, psixolog D.Turdiyeva, universitet Yoshlar yetakchisi S.Haydarov, tyutor B.Allamurodov ishtirok etishdi.

Xotin-qizlar kengashi tomonidan talaba qizlar oʻrtasida doimiy ravishda oʻtkazib kelinayotgan yigʻilishlarning bu galgi mehmoni – universitetning barno yigitlari boʻlishdi. Bahs-munozara shaklida oʻtgan davra suhbati yigitlarning oʻz oʻy-kechinmalarini bildirish imkonini berdi va ularning nechogʻlik ilgʻor, teran va mustaqil fikrli ekanligini namoyon etdi. Ular “Vatan oldidagi burchimiz nimadan iborat?”, “Siz oilaviy hayotga tayyormisiz?”, “Oilada erkakning oʻrni qanday boʻlishi kerak?”, “Oila va nikoh tushunchalariga munosabatingiz”, “Oilaviy nizolar va ularning qanday turlarini bilasiz?”, “Hiyonat va sadoqat tushunchalarini izohlang” kabi savollariga javob berishdi.

M.Abbasova, R.Toshniyozova, S.Haydarov oʻz hayotiy tajribalaridan kelib chiqib, yigitlarga qimmatli maslahat va tavsiyalar berishdi. Oʻz navbatida, oila atalmish qurgʻonni qadrlash, avaylash, uni muqaddas sanash, masʼuliyatli boʻlishga chaqirishdi. D.Turdiyeva esa masʼuliyat tushunchasining psixologik aspektlari haqida toʻxtalib, uning inson hayoti, shaxs kamoloti uchun nechogʻlik muhim ekanligini tushuntirdi.