Joriy yilning 2-mart kuni “Yaqinlarga mehr va muhabbat ulashish” kuni doirasida “Ipak yo‘li” turizm va madaniy meros xalqaro universiteti psixologi Dildora Turdiyeva tomonidan motivatsion trening tashkil etildi.

    Afsuski, bugungi kunda insoniy his-tuyg‘ular va axloqiy fazilatlar tobora o‘z ahamiyatini yo‘qotib bormoqda. Hayot tashvishlari, kundalik muammolar odamlarni butkul holdan toydirmoqda, ko‘pchilik emotsional beqarorlik, hissiy charchash - yonishni boshidan kechirmoqda. Shuning uchun bugungi kunda psixologik farovonlikka erishish juda muhimdir.

    Bugungi trening maqsadi: ijobiy fikrlash, o‘z-o‘zini boshqarish, nazorat qilish qobiliyatini shakllantirish, ijobiy his-tuyg‘ularni yaratish, stressdan xalos bo‘lish, hissiy barqarorlikni rivojlantirish, o‘ziga ishonch hissini paydo qilish, bir-biriga do‘stona munosabatda bo‘lish, o‘zini omad, baxt, ezgulik, mehr-muhabbat, tinchlik va muvaffaqiyatga dasturlashni o‘rganish.

    Trening davomida psixolog Dildora Turdiyeva tomonidan bir qancha qiziqarli psixologik eksperimentlar, o‘yinlar, affirmatsiya seansi o‘tkazilib, yig‘ilganlarning umumiy kayfiyatini ko‘tarishga xizmat qildi. Motivatsion trening interaktiv shaklda o‘tkazildi, taklif va shaxsiy fikrlar tinglandi.

    Relaksatsion musiqa va kofe-breyk o‘rin olgan tadbir iliq va samimiy do‘stona muhitda o‘tdi va barcha ishtirokchilarda ijobiy his-tuyg‘ularni uyg‘otdi. Bir so‘z bilan aytganda, oldimizga qo‘yilgan maqsadga erishildi!