“Ipak yo‘li” turizm va madaniy meros xalqaro universiteti “Tillar” kafedrasi  tayanch doktoranti Zarifa Eshmurodova filologiya fanlari bo‘yicha falsafa doktori (PhD) ilmiy darajasiga ega bo‘ldi.

Doktorant 2021-yil 10.00.06 – “Qiyosiy adabiyotshunoslik, chog‘ishtirma tilshunoslik va tarjimashunoslik” ixtisosligi bo‘yicha kafedraga tayanch doktorant sifatida qabul qilingan. Yosh olima “Fransuz va o‘zbek dostonlarida etnomadaniyatga xos leksemalarning qiyosiy tadqiqi («Chanson de Roland» va «Alpomish» dostonlari materiali asosida)” mavzusida tadqiqot olib bordi. Tadqiqot doirasida 2022-yil Fransiyaning Sorbonna Universiteti va INALCO – Fransiya Sharq tillari va rivojlanish milliy institutida dissertatsiya mavzusi ustida ilmiy izlanishlar olib bordi. Z.Eshmurodova 2022-yil avgust oyida Fransiyaning O‘zbekistondagi elchixonasi tomonidan Fransuz tili o‘qituvchilari uchun tashkil qilingan grant tanlovida g‘olib bo‘lib, Fransiyaning Klermon Overn universitetida malaka oshirib qaytdi.

 Z.Eshmurodova “Tillar” kafedrasi mudiri, dotsent, filologiya fanlari bo‘yicha falsafa doktori Sultanov Tulkin Irgashevich bilan hammualliflikda “Turistlar uchun fransuzcha-o‘zbekcha va o‘zbekcha-fransuzcha so‘zlashgich” kitobini nashr qildi.

 Zarifa Eshmurodova universitetning tadqiqot ishini muddatidan oldin tamomlab, dissertatsiya ishini himoya qilgan ilk doktoranti hisoblanadi. Iqtidorli olimaning kelgusi ishlarida muvaffaqiyatlar tilaymiz!