Dual ta’lim tizimi – ixtisoslashgan ta’lim turi bo‘lib, talaba nazariy bilimlarni ta’lim muassasasida, amaliy ko‘nikmalarini esa bevosita ish joyida, ya’ni tashkilotda olish imkoniyatini yaratib beradi. Dual ta’limining asosiy maqsadi ta’lim muassasasi va ish beruvchilarning sa’y-harakatlari amaliy mashg‘ulotlarning asosiy omili sifatida birlashtirib, talabalarning kasbiy tayyorgarlik sifatini oshirishdan iborat.

2021-yil 19-yanvar kuni “Ipak yo‘li” turizm xalqaro universitetida innovatsion ta’lim tizimi sifatida tan olingan dual ta’lim bilan yaqindan tanishish maqsadida universitet O‘quv-ishlab chiqarish markazi (O‘IChM) direktori – Muxamednazarova I.V. tomonidan tashkil etilgan seminar-trening o‘tkazildi.

O‘IChM direktorining so‘zlariga ko‘ra, “Ipak yo‘li” universitetida dual ta’limni joriy etish maqsadida quyidagi ishlar bosqichma-bosqich amalga oshirilmoqda:
- ta’lim muassasasi va korxonalar o‘rtasida shartnoma imzolash;
- kadrlar borasida ehtiyojlarni aniqlash;
- kadrlar tayyorlash yo‘nalishini tashkil etish;
- mehnat bozoridagi talabga muvofiq o‘quv dasturlarini yaratish va ularni doimiy ravishda yangilash;
- dual ta’limda tahsil olgan tayyor kadrlarning malakasini baholash.

Mazkur seminar-treningda dual ta’lim kontseptsiya, talabalar va ish beruvchilar uchun uning afzalliklari haqida ham alohida gapirilib o‘tildi.

Kasbiy dual ta’limi tizimining kontseptsiyasi o‘quv va ishlab chiqarish jarayonlarini birlashtirish orqali mutaxassislarni tayyorlashda amaliy yo‘nalishni kuchaytirishga asoslanadi, bu esa o‘quv muassasalari bitiruvchilarining kasbiy harakatchanligini sezilarli darajada oshiradi. Dual ta’lim tizimi samarali va moslashuvchan mexanizm bo‘lib, turli soha korxonalari tomonidan bozor iqtisodiyotining zamonaviy sharoitlarida talab yuqori bo‘lgan malakali mutaxassislarni tayyorlash imkonini beradi.