2021-yil 28-yanvar kuni “Ipak yo‘li” turizm xalqaro universitetining majlislar zalida maishiy chiqindilar va atrof-muhitni muhofaza qilish madaniyatini shakllantirishga bag‘ishlangan seminar bo‘lib o‘tdi.

Seminarda Samarqandda shahar infratuzilmasi va xizmatlarini yaxshilashga, chiqindilarni kompleks boshqarishga qaratilgan loyihasi amalga oshirilayotgani haqida aytib o‘tildi. Xususan, ushbu tadbir texnik maishiy chiqindilarni yig‘ish, olib chiqish va joylashtirish tizimini takomillashtirish, shaharning sanitariya va ekologik holatini yaxshilash, atmosferaga zararli moddalar emissiyasini kamaytirish, chiqindilarni boshqarish masalalariga jamoatchilikni jalb etishga qaratilgan.

“Maroqand Obod” davlat unitar korxonasi direktori Nasimov Sherxon universitet talabalariga so‘nggi yillarda sodir bo‘layotgan o‘zgarishlar, korxona sifatini oshirish bo‘yicha qanday ishlar olib borilayotganligi to‘g‘risida gapirib berdi, yoshlarni atrof-muhitni muhofaza qilishda faol ishtirok etishga chaqirdi.

Shuningdek, “Suereca” (Fransiya) kompaniyasining maslahatchisi Gabriel Mihai Ginea barcha ishtirokchilarni 3R printsipi bilan tanishtirdi: REDUCE! – chiqindilarni kamaytirish; REUSE! – qayta foydalanish; RECYCLE! – qayta ishlash.

Bunday tadbirlarni nafaqat universitetlarda, balki bolalar bog‘chalarida, maktablarda, mahallalarda ham o‘tkazish rejalashtirilgan.