Joriy yilning 16-sentabr kuni ShHT sammiti doirasida Hindiston delegatsiyasi “Ipak yoʻli” xalqaro turizm va madaniy meros universitetiga tashrif buyurdi.

Tashrif davomida delegatsiya OTM faoliyati bilan tanishdi, shuningdek, universitet kutubxonasiga Hindiston Bosh vaziri nomidan siyosat, iqtisodiyot, turizm, madaniyat, tarix, meʼmorchilik va boshqa sohadagi mamlakatning turli jihatlarini qamrab oluvchi Hindiston haqidagi 200 dan ortiq kitoblarni taqdim etdi.

Qayd etish joiz, kitoblarning taqdim etilishi madaniy diplomatiyani rivojlantirishga yorqin misol boʻlib xizmat qiladi, shuningdek, taʼlim va turizm sohasida oʻzbek-hind munosabatlarini mustahkamlashga katta hissa qoʻshadi.

Hozirda universitet kutubxonasida madaniy merosni saqlab qolish uchun kitoblarning noyob toʻplami yigʻilgan. Oʻzbekiston Bosh vazirining oʻrinbosari – Turizm va madaniy meros vaziri va “Ipak yoʻli” xalqaro turizm va madaniy meros universiteti rektori Aziz Abduhakimov boshchiligida kutubxonaga qisqa muddat ichida turizm, sanʼat, tarix, arxeologiya, etnologiya, geosiyosat, iqtisodiyot, madaniyatshunoslik, dinshunoslik, rassomlik, haykaltaroshlik, meʼmorchilik, madaniy meros kabi yoʻnalishlar boʻyicha dunyoning turli burchaklarida bosib chiqarilgan 20 mingga yaqin kitoblar yetkazildi. Shuningdek, universitet kutubxonasida 100 mingdan ortiq kitoblar elektron koʻrinishda taqdim etilgan.