Yangiliklar: May 2024

Joriy yilning 6-may kuni “Ipak yo‘li” turizm va madaniy meros xalqaro universiteti xotin-qizlar kengashi raisi M.Abbasova hamda universitetning Yoshlar bilan  ishlash va tadbirlar bo’limi boshlig’i N.Abduvoxidova bilan birgalikda talaba-qizlar o‘rtasida “Qizlar gigiyenasi hamda sog‘lom turmush tarzi va  erta nikohning salbiy oqibatlari” mavzusida soha mutaxassislari bilan uchrashuv tashkil etildi.

Uchrashuvda tadbir tashkilotchilari tomonidan “Fuqarolarning reproduktiv salomatligini saqlash to‘g‘risidagi hujjatlarning mazmun mohiyati”, “ Qizlar gigiyenasi farovon hayot asosidir”, “Sog’lom turmush tarzi tarafdorimiz”  kabi mavzularda ma’ruzalar qilindi.

Tadbirda universitetimiz shifokori S.Mustafakulova va Samarqand shahar markaziy ko‘p tarmoqli poliklinikasi shifokori D.Mamatova tomonidan  talaba-qizlar o‘rtasida “Qizlar gigiyenasi salomatlik garovi”, ”Erta nikoh va erta tug‘ruq hamda qarindoshlar o‘rtasidagi nikohning salbiy oqibatlari” mavzularida qator muhim va kerakli tavsiyalar berildi.

Uchrashuvda mas‘ullar tomonidan oila, nikoh, uning asosiy vazifasi  kabilar xususida tushunchalar berilib, talaba-qizlarni qiziqtirgan savollariga javob qaytirildi. 

Joriy yilning 8-may kuni soat 15:00 da universitet 108-xonasida “Ipak yo‘li” turizm va madaniy meros xalqaro universitetida oliy ta’limdan keyingi ta’lim institutlarida tahsil olayotgan 3-bosqich tayanch doktorantlar, mustaqil izlanuvchilarning dissertatsiya ishining natijalari bo‘yicha mustaqil ravishda o‘tkazadigan ilmiy seminarlar rejasiga ko‘ra, o‘tkazilishi ko‘zda tutilgan universitet tayanch doktoranti Asadova Aziza Olimjonovnaning “O‘zbekistonda nostalgik (qo‘msash) turizmni rivojlantirishning tashkiliy-iqtisodiy mexanizmni takomillashtirish” mavzusida olib borayotgan dissertatsiya ishning yakuni bo‘yicha yakka tartibdagi seminariga qiziquvchi barchani taklif etamiz.

Shu kunlarda O‘zbekiston Respublikasi Prezidentining 2021-yil 30-oktyabrdagi PQ-5270-sonli qarori asosida Samarqand shahridagi umumiy o‘rta ta’lim maktab o‘quvchilari hamda oliy ta’lim muassasalari talabalarini “Ipak yo‘li” turizm va madaniy meros xalqaro universiteti qoshidagi Art rezidensiyada o‘tkazilayotgan Sharja Amirligining Arxeologik topilmalari ko‘rgazmasiga sayohati tashkil qilib kelinayapti.

Joriy yilning aprel, may oylari davomida ushbu ko‘rgazma hamda “Ipak yo‘li” turizm va madaniy meros xalqaro universiteti faoliyati bilan yaqindan tanishtirish, yoshlarni badiiy ijodga, kitobga hamda oliy ta’lim bo‘lgan qiziqishlarini yanada oshirish maqsadida 10, 34-umumta’lim maktablari bitiruvchi sinf o‘quvchilari tashrifi tashkil qilinib, unda o‘quvchilar bir olam taassurot bilan qaytishmoqda.

Joriy yilning 3-may kuni Ilmiy tadqiqotlar bo‘limi hamda fakultet dekani ofisi hamkorligida O‘zbekiston Respublikasi Prezidenti va nomli davlat stipendiyalariga 2024-yilgi tanlovi uchun talabalarimiz orasidan talabgorlarni aniqlash, hujjatlarini esa qay tarzda taqdim etishi yuzasidan seminar trening o‘tkazildi.

Universitetimizning bir guruh doktorantlari Germaniyaning HTWG Konstanz universitetida "International Management Asia-Europe" xalqaro konferensiyasida ishtirok etishdi.

Germaniya, Xitoy, Vietnam, Indoneziya va AQSH kabi davlatlardan taniqli professorlar hamda ilmiy ishlarda faollik ko‘rsatayotgan doktorantlar ishtirok etishdi. Konferensiya ishida oliygohimiz ilmiy izlanuvchilari o'zlarining qator tadqiqot ishlarining taqdimotini qilishdi.

- Men “Ipak yo‘li” turizm va madaniy meros xalqaro universiteti doktoranti sifatida ushbu nufuzli xalqaro konferensiyada ishtirok etib, xorijiy davlatlardagi fan doktorlari, professorlar hamda ilmiy izlanuvchilar bilan yaqindan muloqot qildim va o‘zimning ilmiy ishim doirasida yanada ko‘proq bilimga, malakaga ega bo‘ldim,-deydi ilmiy izlanuvchi D.Mardonova.

Avval xabar berganimizdek, 3-4-may kunlari “Ipak yo‘li” turizm va madaniy meros xalqaro universitetida o‘tkazilayotgan “IPAK YO‘LIDA TIL, ADABIYOT, TARJIMA, TURIZM VA MADANIY MEROS SOHASI TADQIQIDA INNOVATSION YONDASHUVLAR” mavzusidagi xalqaro ilmiy-amaliy konferensiya ishtirokchilari tomonidan konferensiya mavzui yuzasidan qator ma’ruzalar qilinayapti.

Dastlab T.N.Qori Niyoziy nomidagi Oʻzbekiston pedagogika fanlari ilmiy tadqiqot instituti direktori, akademik,  X.Ibraimov,  Ege universiteti “Turk tili ve shevalari” kafedrasi professsori İbrahim Şahin (Turkiya), Rossiya davlat gumanitar fanlar universiteti (Koreya) o‘qituvchisi Kim Hye Ran, Toshkent davlat pedagogika universiteti professori Barno Abdullayeva va boshqalar o‘z ma’ruzalari bilan faol ishtirok etishdi.

Ushbu xalqaro konferensiyaga nafaqat yurtimizdagi olimlar, balki xorijiy mamlakatlar olimlari, mamlakatimizning turli oliy ta’lim muassasalari, Ilmiy tekshirish institutlari va ishlab chiqarish korxonalaridan 300 dan ortiq sohaning professor-o‘qituvchilari, amaliyotchilar hamda yosh tadqiqotchilar tashrif buyurishdi.

Konferensiyada xorijiy mamlakatlardan 100 ga yaqin, yurtimiz olimlari tomonidan 300 ga yaqin  maqolalar kelib tushdi va ulardan 259 ta eng yuqori ilmiy natija va tavsiyalarga ega bo‘lganlari saralab olinib qabul qilindi. Konferensiyaga qabul qilingan har bir maqola uchun DOI raqam olindi hamda, bir nechta xalqaro bazalarda indekslandi.

Konferensiya o‘z ishini davom ettirmoqda.

Joriy yilning 2-may kuni ”Ipak yo’li” turizm va madaniy meros xalqaro universiteti xotin-qizlar kengashi raisi M.Abbasova boshchiligida  Talabalar turar joyida talaba qizlar uchun profilaktik suhbatlar tashkil qilindi. Ularga xalqimizning ko‘p yillik qadriyatlarini, urf-odatlarini asrab-avaylash, qadrlash maqsadida ko‘plab hayotiy ma’lumotlar berildi.

Shundan so‘ng talabalarning bo‘sh vaqtini mazmunli tashkil qilish maqsadida qirg‘iz kino ijodkorlari tomonidan tayyorlangan "Jannat onalar oyog'i ostida"nomli kino film namoyish qilindi.

Bugun 3-4-may kunlari “Ipak yo‘li” turizm va madaniy meros xalqaro universitetida o‘tkazilayotgan “IPAK YO‘LIDA TIL, ADABIYOT, TARJIMA, TURIZM VA MADANIY MEROS SOHASI TADQIQIDA INNOVATSION YONDASHUVLAR” mavzusidagi xalqaro ilmiy-amaliy konferensiya o‘z ishini boshladi. Xalqaro konferensiyani universitet rektori A.Abduxakimov kirish so‘zi bilan ochib, barcha anjuman ishtirokchilarini, xorijdan kelgan professor-o‘qituvchilarni “Ipak yo‘li” turizm va madaniy meros xalqaro universitetiga xush kelibsiz, deya konferensiya ishiga omad tiladi. Shundan so‘ng konferensiyada dastlabki ma’ruzani Turkiyaning Ege universiteti Turk dunyosi tadqiqotlari instituti Turk dunyosi adabiyotlari kafedrasi professori Mexmet Temizkan boshlab berdi.

Ma’lumot uchun shuni aytish kerak, ushbu nufuzli konferensiyda ipak yo‘li mamlakatlarida til, adabiyot, tarjimashunoslik, turizm, madaniy meros, pedagogika sohasi tadqiqida innovatsion yondashuvlarni, aspektlarni va aloqadorlik jihatlarini ochib berish hamda ushbu sohalarda amalga oshirilayotgan global ishlarni tahlil qilish, xalqaro tajribalarni o‘rganish orqali mamlakatimizning turistik salohiyatini ichki va tashqi bozorlarda keng targ‘ib qilishni jadallashtirish va shu kabi mavzu yuzasidan ilmiy va amaliy ishlar olib borish masalalari ko‘rib chiqilmoqda.  

2024-yil 4-may kuni, soat 10:00da (universitet binosi 108-xona) “Ipak yo‘li” turizm va madaniy meros xalqaro universiteti qoshidagi iqtisodiyot fanlari bo‘yicha ilmiy darajalar beruvchi DSc.33/01.02.2022.I.145.01 raqamli Ilmiy Kengash huzuridagi Ilmiy seminarda Samarqand iqtisodiyot va servis instituti mustaqil izlanuvchisi Ablaizov Akbar Abduvafo o‘g‘lining 08.00.17 – Turizm va mehmonxona faoliyati (iqtisodiyot fanlari) ixtisosligi bo‘yicha “O‘zbekistonda ekoturizmni tashkil qilish va rivojlantirishning samarali tizimini ishlab chiqish” mavzusida iqtisodiyot fanlari bo‘yicha falsafa doktori (PhD) ilmiy darajasini olish uchun yozilgan dissertatsiyasi muhokamasiga bo‘lib o‘tadi.

O‘zbekiston Respublikasi Prezidenti va nomli davlat stipendiyalariga 2024-yilgi tanlovi uchun universitetimiz talabalari orasidan talabgorlar dastlabki ko‘rib chiqish bosqichiga hujjatlarini qay tarzda taqdim etishlari to‘g‘risida Ilmiy tadqiqotlar bo‘limi hamda fakultet dekani tomonidan 2024-yil 3-may kuni soat 14:00da universitetning 229-xonasida seminar trening tashkil etilishi rejalashtirilgan. Ushbu seminarga tanlovda ishtirok etmoqchi bo‘lgan barcha bakalavr talabalarini taklif etamiz.