Yangiliklar: Avgust 2024

Universitet qabul komissiyasi nomidan Sizlarni talabalikka tavsiya etilganligingiz bilan chin dildan tabriklaymiz va quyidagi hujjatlarni universitet qabul komissiyasiga taqdim qilishlaringizni so‘raymiz:

1. Pasport nusxasi (3 dona);

2. Attestat yoki diplom (asli);

3. IELTS sertifikati (asli, agar mavjud bo'lsa);

4. 3,5 × 4,5 o‘lchamdagi 12 ta rasm;

5. Bilim va malakalarni baholash agentligi (my.uzbmb.uz) tomonidan berilgan Abituriyent ruxsatnomasi;

6. Bilim va malakalarni baholash agentligi (my.uzbmb.uz) tomonidan berilgan Javoblar varaqasi;

7. Imtiyoz asosida talabalikka tavsiya etilganlar uchun (imtiyoz beruvchi hujjatning asli, mavjud bo‘lsa);

8. Konvert (1 dona);

9. Qog‘oz uchun papka.

Qo‘shimcha ma’lumotlar uchun universitet qabul komissiyasining quyidagi telefon raqamlariga murojaat qilishingizni soʻraymiz:

+998662406770

+998662408616

+998662406786

+998662408606

Agar siz qulay va shinam turar joy izlayotgan bo‘lsangiz, unda izlamang, “Ipak yo‘li” turizm va madaniy meros xalqaro universiteti zamonaviy shart-sharoitlar va qulay joyga ega bo‘lgan Talabalar Yotoqxonasiga ega.

Yotoqxonamiz nafaqat qulay turar joyni, balki universitetda o‘qish vaqtida shahar bilan yaqindan tanishish imkoniyatini ham beradi.

Qo‘shimcha ma’lumot olish va xonaga joylashish uchun mas’ul xodimlarimizga quyidagi raqamlar orqali murojaat qilishingiz mumkin: +998662406769 +998662406780

Sizga muvaffaqiyatli o‘quv yili va qulay turar joy tilaymiz!

Joriy yilning 16-avgust kuni “Ipak yoʻli” xalqaro turizm markazida joylashgan Kongress va EXPO markazlarining rahbari Amirov Azat universitetimizga tashrif buyurdi. Faxriy mehmon bilan uchrashuvni universitetimiz birinchi prorektori D.Nasimov olib bordi. Uchrashuvda tomonlar oʻrtasida kelgusidagi hamkorlik istiqbollari, jumladan, talabalarimizni xalqaro turizm markaziga ishga joylashtirish imkoniyatlari muhokama qilindi. Ushbu tashrif o‘zaro manfaatli hamkorlik yo‘lidagi muhim qadam bo‘lib, talabalarimiz uchun yangi imkoniyatlar hisoblanadi.

2024-yil 17-avgust kuni soat 11:00 da (universitet majlislar zalida) “Ipak yo‘li” turizm va madaniy meros xalqaro universiteti qoshidagi iqtisodiyot fanlari bo‘yicha ilmiy darajalar beruvchi DSc.33/01.02.2022.I.145.01 raqamli Ilmiy Kengashda:

1. Termiz davlat universiteti mustaqil izlanuvchisi Xamzayeva Dilfuza Samarovnaning  08.00.17 – “Turizm va mehmonxona faoliyati” (iqtisodiyot fanlari) ixtisosligi bo‘yicha “Hududlarda turistik mahsulotlarni diversifikatsiyalashning iqtisodiy usullarini takomillashtirish” mavzusidagi falsafa fanlari doktori (PhD) ilmiy darajasini olish uchun yozilgan dissertatsiyasi muhokamasi bo‘lib o‘tadi.

Dissertatsiya ishi himoyasini quyidagi havola orqali universitet ijtimoiy tarmog‘ida jonli efirda kuzatish mumkin. https://youtube.com/@silkroad-internationaluniv577?si=Q6aAkmA1hOUKekH-

Ta’til kunlarida mahalla yoshlarining bo‘sh vaqtini mazmunli tashkil qilish, o‘sib kelayotgan yosh avlodni sportga bo‘lgan qiziqishini yanada oshirish maqsadida “Ipak yo‘li” turizm va madaniy meros xalqaro universiteti sport zalida Samarqand shahridagi qator mahallalar ishtirokida “Quvnoq startlar” musobaqasi tashkil qilindi. Mahalla yoshlarining tashabbuskorligi, epchilligi va chaqqonligi musobaqaning yanada ko‘tarinki o‘tishiga xizmat qildi.   

Joriy yilning 9-12 avgust kunları Vengriya Respublikasining poytaxti Budapesht shahrida va Kechkemet viloyatining tarixiy Bugach tumanidagi bo'z qirlarda 9-Hun-Turk Qurultoyi bo'lib o'tdi.

Dunyodagi 20dan ziyod mamlakatlardan Turkiy va Hun aslli xalqlarning 200dan ortiq olimlari, san'atkorlari va hunarmandlari, fan va madaniyat arboblari ishtirok etgan ushbu Qurultoyda universitetimiz vakili, turkolog-olim, prof. Jo'liboy Eltazarov ham ishtirok etmoqda.

Har ikki yilda Mojor-Turk Jamg'armasi tomonidan Vengriya hukumati shafeligida tashkil etiluvchi bu ilm-fan, madaniyat va san'at qurultoyida Hun-Turk Dunyosining dolzarb va joriy muammolari muhokama etiladi hamda qardosh xalqlarning qadimiy madaniyat, san'at, etnografik an'analarini asrab qolish hamda qaytadan jonlantirish bo'yicha amalga oshiriladigan ishlar belgilab olinadi.

Universitetimiz vakili Qurultoy doirasiada o'tkazilgan ilmiy anjumanda Turkiy Dunyoning geopolitikasi xususidagi o'z qarash va tushunchalarini bayon qildi.

2024-yilning 8-13-avgust kunlari Qashqadaryo viloyatining Shahrisabz tumanida “Yoshlar - kelajak bunyodkorlari!” III xalqaro qurultoyi bo‘lib o‘tdi. Qurultoyda respublikamizning barcha hududlari, Qozog‘iston, Qirg‘iziston, Tojikiston respublikalari delegatlaridan tashqari universitetimizning xorijiy talabalaridan iborat jamoasi ham faol ishtirok etdi.

Besh kun davomida qurultoyda turizm va ekologiya sohasidagi ko‘plab loyiha va festivallar yorqin lahzalarga boy bo‘ldi.

Maqsad yoshlarning ekologiya va ijtimoiy-iqtisodiy sohalardagi faolligini oshirish, ularni turizm sohasiga keng jalb etish, yosh avlodning ekologiya va turizm sohasidagi istiqbolli g‘oyalari hamda loyihalarini ro‘yobga chiqarishdir.

Qurultoy doirasida har kuni bir qator tanlov, musobaqa, taqdimot, uchrashuv, aksiya va loyihalar tashkil etildi. Shu bilan bir qatorda, milliy va etnosport turlari bo‘yicha sport musobaqalari hamda madaniy-ko‘ngilochar tadbirlar, yoshlar uchun biznesni tashkil qilish, hunarmandchilik mahsulotlarini tayyorlash bo‘yicha davra suhbatlari, yoshlar bilan taniqli teatr va kino ijodkorlarining ijodiy muloqotlari, “Yosh ekologlar” harakati va Yosh turizm elchilari Kengashiga saylovlar o‘tkazildi.

Qurultoy doirasida xorijiy delegatsiyalar o‘rtasida tashkil etilgan “Zakovat” intellektual o‘yinida xorijlik talabalardan iborat universitetimiz jamoasi  1-o‘rinni egalladi.

Magistratura yo‘nalishi talabalari diqqatiga!

Yakuniy davlat attestatsiya imtihonlari 2024-yil 9-sentabrda boshlanishini ma’lum qilamiz.

Magistrlik ishlaringizni bir nusxada nashr qilgan holda Magistratura bo‘limiga, 101-xona, taqdim etishlaringizni so‘raymiz. Barcha magistrlik ishlari plagiat reporti bilan qabul qilinadi.

Muddat: 29-avgust, 2024-yil

P.S. Semestr davomida fanlardan qarzdorligi mavjud talabalar yakuniy davlat attestatsiya jarayonlariga qo’yilmaydi. Qarzdor talabalar bo’lsa Magistratura bo’limiga murojaat qilishlariz mumkin.

Universitetimiz xotin-qizlar qo‘mitasi raisi M.Abbasovaga Prezidentimiz tashabbusi bilan tashkil qilingan “Oqila ayollar” harakati tashkil bo‘lganligining 2 yilligi munosabati bilan viloyat hokimligining Tashakkurnomasi topshirildi. Tashаkkurnoma  viloyat hokimi o‘rinbosari Z.Raxmonova tomonidan topshirilib M.Abbasovaning “Oqila ayollar” harakatidagi amaliy ishlari, jonkuyarligi va tashabbuskorligi alohida e’tirof qilindi. Universitetimiz jamoasi ham M.Abbasovani ushbu e’tirof bilan qutlagan holda u kishining kelgusi faoliyatiga muvaffaqiyatlar tilaydi.

Joriy yilning 9-avgust kuni “Ipak yo‘li” turizm va madaniy meros xalqaro  universiteti Ma’muriy masalalar bo‘yicha birinchi prorektori D.Nasimov va boshqa mutasaddilar universitetga qarashli DXSH asosida qurilgan Talabalar turar joyining yangi o‘quv yiliga tayyorgarligi, yaratilgan shart-sharoitlarni o'rgandi va mutasaddilarga mavjud muammolarni zudlik bilan bartaraf etish choralarini ko‘rish yuzasidan zarur ko'rsatmalar berdi.