Shu kunlarda yurtimizda xalqimizning milliy bayramlaridan bo‘lgan Navro‘z bayrami shukuhi kezib yuribdi. Bahorning kelishidan darak beruvchi, xalqimizning urf-odatlarini o‘zida mujassam etgan ushbu bayram tadbirlari Samarqand shahrining markaziy istirohat bog‘ida keng nishonlandi.
Viloyatimizning barcha korxona va tashkilotlari, oliy ta’lim muasassalari ishtirok etgan bayram tantanalarida universitetimiz jamoasi ham faollikni qo‘ldan bermadi va Navro‘zi olamni ko‘tarinki ruhda nishonladi.
Markaziy istirohat bog‘idagi oliygohimizga ajratilgan hududda barcha tayyorgarliklar ko‘rilib, universitetimiz rahbariyati boshchiligida dasturxon bezatildi va unga turli milliy taomlarimiz tortiq qilindi. Dastlab bayram tadbirida universitetimiz Birinchi prorektori, professor Dilmurod Nasimov so‘z olib barchani ushbu milliy bayramimiz bilan chin dildan qutlab o‘zining samimiy tilaklarini bildirdi. Shundan so‘ng bir tomonda milliy sport o‘yinlaridan arqon tortish, kurash musobaqalari tashkil qilingan bo‘lsa, yana bir tomonda “Navro‘zi olam muborak” nomli musiqali tadbirlar o‘tkazildi.
Bayram tadbirlarida universitetimiz talabalarining Xitoy, Koreya, Turkiya kabi davlatlarining milliy musiqalari, raqslari namoyish qilindi. Bu kabi o‘ziga xos milliy tomoshalar markaziy saylgohdagi barchani universitetimiz davrasiga jalb qildi. Bayram tadbirlari davom etmoqda.
2024-yil 20-mart kuni "Ipak yo'li" turizm va madaniy meros xalqaro universiteti talabalari o‘rtasida “Rangtasvir asar”lari bo‘yicha rasmlar tanlovini o‘tkaziladi.
Agar siz rasm chizish qobiliyatiga ega bo’lsangiz va o’z ijod namunalaringiz bilan ushbu tanlovda ishtirok etmoqchi bo‘lsangiz eng sara ijod namunalariz, universitetimiz binosidagi rasmlar galereyasida namoyish qilinadi.
Ishtirok etish istagida boʻlgan talabalar guruh tyutorlarga murojaat qilishingiz mumkin!
Vaqtni boy bermang, tanlovda ishtirok eting!
Tanlov g‘oliblari universitet tomonidan esdalik sovg’alari bilan taqdirlanadi.
Yaqinda “Ipak yo‘li” turizm va madaniy meros xalqaro universiteti “Turizm” kafedrasi o`qituvchisi boshchiligidagi talabalardan iborat delegatsiyasi Buyuk Britaniyaga qilgan tashrifi chog‘ida top universitetlarda talabalarga yaratilgan shart-sharoit va imkoniyatlar bilan yaqindan tanishishdi.
Dastlab universitetimiz o‘qituvchisi va talabalaridan iborat delegatsiya a’zolarini Oxford Brookes PhD studenti Sanjar Jumanazarovning iliq kutib oldi. Sanjar ularga kampus bo‘ylab ekskursiya uyushtirdi va oliygoh faoliyati bilan tanishib ta`lim tizimini ko‘zdan kechirdi. Shundan so‘ng “Ipak yo‘li” turizm va madaniy meros xalqaro universiteti hamda Oxford Brookes universiteti o‘rtasidagi potentsial hamkorlikni yanada mustahkamlash yuzasidan mazmunli suhbatlar o‘tkazildi.
Suhbat jarayonida kelgusida akademik almashinuv dasturlari va qo'shma tadqiqot tashabbuslari xususida so‘z bordi. Bundan tashqari universitetimiz vakillari dunyodagi mashhur Oksford universitetida va Bodleian kutubxonasida ham bo‘lishdi.
Bu kabi amaliy tashriflar nafaqat Oxford Brookes va Oksford universitetlari bilan tanishish balki talabalarimizning ta’lim tajribasini sezilarli darajada ошишига va hamkorlikning yanada yaxshilanishiga muhim omil yaratadi.
Shu o‘rinda delegatsiya a’zolari Sanjar Jumanazarovga samimiy mehmondo'stligi uchun hamda Oxford Brookes va Oxford universiteti mutasaddilariga ularni samimiy kutib olgani uchun o‘z minnatdorchiliklarini bildirishdi.
Avval xabar berganimizdek, O‘zbekiston Respublikasi Vazirlar Mahkamasining 2024-yil 6-martdagi 137-F-son farmoyishiga asosan joriy yilning 16-18-mart kunlari “Obod va fayzli mahalla — yurt ko'rki” shiori ostida umumxalq xayriya hasharini o‘tkazish belgilangan bo‘lib, unga ko‘ra, “Ipak yo‘li” turizm va madaniy meros xalqaro universiteti xodimlari ishtirokida hashar o‘tkazildi. Hasharning birinchi kunida universitet hovlisi obod va orasta maskanga aylantirildi. Mevali va manzarali ko‘chatlar ekilib, daraxtlarga shakl berildi. Turli xildagi gullar ekilib atrofdagi yashil maskan tartibga keltirildi. Hasharning ikkinchi kunida universitet binosi ichidagi o‘quv xonalari, eshik va derazalar chang va g‘ubordan to‘liq tozalandi. Shuningdek jamoa bir yoqadan bosh chiqarib hamjihatlikda kutubxonani, milliy liboslar galeriyasini ham tozalashga erishdi. Hasharning uchinchi kunida esa daraxtlar oqlanib, universitet oldidan o‘tgan kanal yoqalaridagi axlat uyumlari olib chiqib ketildi. Umuman olganda ushbu umumxalq xayriya hasharida barcha universitetimiz professor-o‘qituvchilari, xodimlari bir tanu, bir jon bo‘lib o‘z hissasini qo‘shdi.
“Tillar va global tadqiqotlar” kafedrasi mudiri PhD T.I.Sultanov tomonidan kafedra professor-o‘qituvchilari uchun “Nufuzli xalqaro jurnallarda maqola nashr ettirish” mavzusida seminar-trening o‘tkazildi. Seminarda Elsevier xorijiy ma’lumotlar bazasidan o‘rin olgan nufuzli jurnallarni topish yo‘llari, “Scopus” bibliografik maʼlumotlar bazasida jjoylashgan Q1, Q2, Q3 v Q4 kategoriyasidagi jurnallarning saytidan ro‘yxatdan o‘tish va maqola yuborish usullari haqida ma’lumot berildi.
Shuningdek, Turkiyadagi nufuzli xalqaro jurnallarni o‘zida birlashtirgan DergiPark tashkilotining saytidan ro‘yxatdan o‘tish bosqichlari, Turkiyaning “Scopus” bibliografik maʼlumotlar bazasiga kiritilgan jurnallarida maqola nashr ettirish shartlari va maqolani rasmiylashtirish talablari bo‘yicha batafsil tushuntirib o‘tildi. Ishtirokchilarni qiziqtirgan savollarga aniq javoblar berildi. Professor-o‘qituvchilar tomonidan nufuzli jurnallarda maqola nashr ettirilishi universitet xalqaro reytingining yanada oshishiga muhim ta’sir ko‘rsatishi ta’kidlandi.
"Milliy liboslar kuni" aksiyasi
"Ipak yo'li" turizm va madaniy meros xalqaro universitetida
19–mart seshanba kuni "Milliy liboslar kuni" deb e'lon qilindi. Shu munosabat bilan hurmatli universitetimiz professor-o'qituvchilari, xodimlari va talabalarini ushbu aksiyada foal ishtirok etishlarini so‘rab qolamiz.
Milliy qadriyatlarni ulug'lashga qaratilgan ushbu tadbirda universitetning barcha professor-o'qituvchilari, xodimlari va talabalari kun davomida milliy liboslarda faoliyat yuritishlari hamda ta’lim olishlari kutilmoqda.
Safimizga qo'shiling va 19-mart kuni milliy libosda ishga keling!
Oʻzbekiston Respublikasi Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Turizm Qoʻmitasining tegishli qaroriga hamda Rektor A.A.Abduxakimovning buyrugʻiga asosan Nasimov Dilmurod Abdulloyevich Maʼmuriy ishlar boʻyicha Birinchi Prorektor lavozimiga tayinlandi.
Nasimov Dilmurod Abdulloyevich Samarqand Davlat universitetining iqtisodiyot fakultetini va shu taʼlim yoʻnalishida magistraturani bitirgan. Chexiya Respublikasining Tomas Bata Universitetida doktoranturani oʻtagan. Iqtisodiyot fanlari doktori (DSc), professor.
Nasimov Dilmurod Abdulloyevich bundan avval bir necha yillar davomida Davlat boshqaruvi akademiyasining Samarqand hududiy filiali direktori, Samarqand Davlat universitetida ilmiy tadqiqot va ilmiy pedagogik kadrlarni tayyorlash bo‘limi boshlig‘i va kafedra mudiri lavozimlarida faoliyat koʻrsatgan.
Universitet Rektori A.A.Abduxakimov D.A.Nasimovni jamoa bilan tanishtirib, unga Birinchi Prorektor lavozimida muvaffaqiyat bilan ishlashini tiladi hamda universitet oldida turgan birinchi navbatdagi vazifalar ijrosiga eʼtibor qaratish lozimligiga urgʻu berdi.
Bugun 15-mart kuni O‘zbekiston Respublikasi Prezidentining 2024-yil 12-yanvardagi PQ-19-son qarori ijrosini ta’minlash, xorijlik talabalar o‘rtasida o‘zbek tilini keng targ‘ib qilish maqsadida universitetimiz axborot resurs markazida Yozuvchilar uyushmasi viloyat bo‘limi a’zolari ishtirokida adabiy kecha o‘tkazildi. Xorijlik va mahalliy talabalarimiz ishtirok etgan tadbirni universitetimiz Xotin-qizlar kengashi raisi M.Abbasova olib bordi. Dastlab tadbirda taniqli ijodkor Zulfiyaxonimning samarqandlik shogirdi bo‘lgan va bugungi kunda Yozuvchilar uyushmasi viloyat bo‘limi a’zolaridan biri bo‘lgan H.Karimova so‘z olib adabiyotda o‘zbek tilining o‘rni va roliga keng to‘xtalib o‘tdi. Shundan so‘ng Yozuvchilar uyushmasi viloyat bo‘limi a’zosi shoira E.Maxmudova ona vatanni, o‘zbek tilini madh etuvchi she’rlaridan o‘qib eshittirdi. Shuningdek tadbirda universitetimiz Tillar va global tadqiqotlar kafedrasi mudiri, dotsent T.Sultonov Prezidentimizning 2024-yil 12-yanvardagi PQ-19-son qarori ijrosi yuzasidan universitetimizda ham kafedra tashkil qilinayotganligi va bu boradagi ishlar izchil amalga oshirilayotganligi xususida gapirdi.
Tadbirda iqtidorli talabalarimiz tomonidan o‘zbek xalqining mashhur yozuvchisi A.Qodiriyning “O‘tgan kunlar” asaridan bir parcha sahnalashtirilib namoyish qilindi. Shuningdek tadbirda talabalarimiz ham o‘z ijod namunalaridan o‘qib berdi. Tadbir ko‘tarinki ruhda tashkil qilinganligi va barcha xorijlik talabalarda katta taassurot qoldirganligi bilan esda qolarli bo‘ldi.
Joriy yilning 14-mart kuni “Ipak yo‘li” turizm va madaniy meros xalqaro universitetida viloyat Monopoliya boshqarmasi mas’ul mutaxassislari ishtirokida “Moliyaviy savodxonlik” mavzui yuzasidan amaliy muloqot tashkil qilindi. Tadbirda universitetimizning birinchi, ikkinchi va uchinchi bosqich talabalari ishtirok etishdi. Har bir kishi ma’lum darajada pul mablag‘i topar ekan uni ishlatish jarayonlari haqida ham to‘liq bilishi lozim bo‘ladi. Amaliy muloqot davomida mas’ul iqtisodchi mutaxassis tomonidan moliyaviy savodxonlikning ahamiyatli tomonlari, uni boshqarish kabilar yuzasidan tahliliy tushuntirish berildi va talabalar tomonidan berilgan savollarga javob qaytarildi.
Spikerlar:
Laziza ISFAXONOVA, “Ipak yo‘li” xalqaro turizm markazi brending va sertifikatlashtirish menejeri.
Bexruz MAMASADIKOV, “Ipak yo‘li” xalqaro turizm markazi brending va sertifikatlashtirish bo‘limi boshlig‘i.
Mavzu: «Mehmondo‘stlik va turizm sohasidagi yoshlar uchun imkoniyatlar - sohada qanday muvaffaqiyatga erish mumkin.
Moderator: Turizm kafedrasi mudiri, Dr. Akmaljon Odilov
O‘tkazilish joyi: 229-ma’ruza zali
Vaqt: 11:00-12:00, 2024-yil 19-mart (seshanba)
140104, O’zbekiston Respublikasi, Samarqand shahri, Universitet xiyoboni, 17
dummy+99866 240-67-68
dummy info@univ-silkroad.uz