Yangiliklar: Oktyabr 2023

Bugungi kunda turizm sohasi mamlakatimiz iqtisodiyotining yetakchi tarmoqlaridan biriga aylanib bormoqda. Prezidentimizning sohani isloh qilish borasida olib borgan siyosati natijasida bugun sohada qator keng ko‘lamdagi amaliy ishlar olib borilmoqda.

Joriy yilning 20-oktabr kuni  Samarqand shahrida Butunjahon turizm tashkiloti Bosh Assambleyasining 25-sessiyasini o‘tkazish doirasida Xalqaro Turizm Akademiyasi va “Ipak yo‘li” tematik ofisining ochilishi bo‘lib o‘tdi. Tantanali tadbirda universitet rektori A.Abduxakimov va Butunjahon turizm tashkiloti (UNWTO) bosh kotibi Zurab Pololikashvili ishtirok etdi va sohada mutaxassislar tayyorlash uchun muhim sanalgan Xalqaro Turizm Akademiyasi va “Ipak yo‘li” tematik ofisini ochib berdi va bugungi kunda sohada olib borilayotgan islohatlarning soha rivoji uchun nechog‘lik muhim ekanligiga to‘xtalib o‘tdi. Shundan so‘ng tadbir ishtirokchilariga ushbu binolarda yaratilgan shart-sharoitlar va imkoniyatlar bilan tanishtirib o‘tildi.

Ahamiyatlisi, foydalanishga topshirilgan Xalqaro Turizm Akademiyasida talabalarning sohani chuqur o‘rganishlari uchun barcha xalqaro darajadagi sharoitlar muhayyo qilingan. Endilikda talaba yoshlar shu yerning o‘zida turizm sohasi uchun muhim bo‘lgan xizmat ko‘rsatishning barcha yo‘nalishlarida ta’lim olish bilan birga, amaliyot jarayonlari ham o‘tashadi. Bundan tashqari zamonaviy kutubxona, o‘quv xonalari talaba yoshlarning bilim olishlari uchun barpo qilindi.

Tadbir ishtirokchilari bu kabi yuqori darajada yaratilgan imkoniyatlar bilan tanishib O‘zbekistonda turizm sohasining yuksak darajada ravnaq topayotganligiga yana bir bor amin bo‘lishdi. 

Joriy yilning 16-20 oktabr kunlari Samarqandda Butunjahon turizm tashkiloti (UNWTO) Bosh Assambleyasining 25-sessiyasini o‘tkazish doirasida qator tadbirlar ko‘tarinki ruhda tashkil qilindi. Tadbirlarda butun dunyo davlatlarining turizm vazirlari, yetakchi kompaniya rahbarlari, olimlar ishtirok etishdi. 20-oktabr kuni Butunjahon turizm tashkiloti (UNWTO) Bosh Assambleyasining 25-sessiyasini o‘tkazish doirasida mamlakatimizda bo‘lib turgan BMT tizimidagi ushbu yetakchi tuzilmaning bosh kotibi Zurab Pololikashvili va tadbir ishtirokchilari, ommaviy axborot vositalari vakillari “Ipak yo‘li” turizm va madaniy meros xalqaro universitetiga tashrif buyurishdi. Mehmonga universitetimiz rektori A.Abduxakimov hamrohlik qildi va oliygohda olib borilayotgan keng ko‘lamdagi ishlar, ta’lim-tarbiya jarayonlari bilan yaqindan tanishtirdi.

Muhtaram Prezidentimiz tashabbusi bilan tashkil qilingan oliygohda turizm sohasida ta’lim olayotgan talabalar uchun barcha shart-sharoitlar va imkoniyatlar bilan birga, milliy liboslar galeriyasi tashkil qilingan. Mehmonlarga turizm sohasi tashkil qilingan laboratoriyalar faoliyati yaqindan tanishtirildi. Universitetda amalga oshirilgan amaliy ishlar barcha mehmonlarda juda katta qiziqish o‘yg‘otdi.  

Joriy yilning 20-oktabr kuni “Ipak yo‘li” turizm va madaniy meros xalqaro universitetida SHHT turizm sanoatini rivojlantirishga bagʻishlangan qoʻshma ilmiy-amaliy konferensiya o‘tkazildi. Ilmiy-amaliy konferensiyani universitetimiz rektori A.Abduxakimov kirish so‘zi bilan ochib, bugungi kunda SHHT davlatlari o‘rtasida turizm sanoatini rivojlantirish muhim masalalardan biri ekanligi, bu borada O‘zbekiston barcha Shanxay hamkorligi tashkilotiga a’zo davlatlar bilan hamkorlik qilishga tayyor ekanligi xususida gapirib, konferensiya ishiga omad tiladi. SHHT bosh kotibi o‘rinbosari Shri Janesh Kain ham Shanxay hamkorligi tashkilotiga a’zo davlatlar o‘rtasida turizm sohasini rivojlantirish eng dolzarb vazifalardan biri ekanligi ta’kidladi va bu iqtisodiyotning yanada yuksalishiga muhim omil bo‘lib xizmat qilishi xususida gapirdi. Shuningdek konferensiyada mavzu yuzasidan ko‘plab ma’ruzalar qilindi.

Samarqand shahrida BMT Jahon turizm tashkilotining 25-Bosh Assambleyasi doirasida “Ta’lim bo‘yicha Global Forum: qurilish turizmining asosi” xalqaro ta’lim forumi o‘tkazildi.  Unda dunyoning 30 dan ortiq mamlakatlaridan, shu jumladan Ozarbayjon, Belarussiya, Buyuk Britaniya, Gretsiya, Hindiston, Italiya, Eron, Ispaniya, Qozog‘iston, Qirg‘iziston, Xitoy, Malayziya, Pokiston va boshqa davlatlardan 1200 dan ortiq xorijiy va mahalliy mutaxassislar va ekspertlar ishtirok etishdi.

Jahon sayyohlik tashkilotining ushbu forumi ta’lim va turizmni rivojlantirish o‘rtasidagi uzviy bog‘liqlikka urg‘u beradi. Butun dunyo hamjamiyatiga ta’lim turizm sanoatining kelajagi uchun barqaror rivojlanish va inklyuziv o‘sish vositasi sifatida hal qiluvchi ahamiyatini yana bir bor eslatdi. Forumda O‘zbekiston respublikasi Ekologiya, atrof-muhitni muhofaza qilish va iqlim o‘zgarishi vaziri, “Ipak yo‘li” turizm va madaniy meros xalqaro universiteti rektori Aziz Abduxakimov, UNWTO bosh kotibi Zurab Pololikashvili, Maktabgacha va maktab ta’limi vaziri Xilola Umarova va UNWTO ta’lim yo‘nalishi bo‘yicha UNWTO  ijrochi direktori Natalya Bayona xonim ma’ruza qildi. Ma’ruzalarda bugungi kunda turizm sohasiga malakali mutaxassislar tayyorlashda ta’lim bilan turizm sohasining uzviyligini yo‘lga qo‘yish, bu borada davlatlar o‘rtasida hamkorlikni mustahkamlash, ilmiy, innovatsion yutuqlarni hayotga tadbiq qilish kabi dolzarb masalalar o‘rtaga tashlandi.

Xalqaro forum yakunida ko‘plab o‘zaro anglashuv va hamkorlik to‘g‘risida bir qator memorandumlar imzolandi.  

Joriy yilning 20-oktabr kuni soat 9:00 da "Ipak yo'li" turizm va madaqniy meros xalqaro universitetida SHHT turizm sanoatini rivojlantirishga bagʻishlangan qoʻshma ilmiy-amaliy konferensiya o'z ishini boshlaydi. Barcha soha mutaxassislarini taklif etamiz!

Joriy yilning 18-oktabr kuni Xitoyning Gongkong Politexnika universiteti dekani, professor Kaye Chon tashrif buyurdi. Mehmonni universitet Birinchi prorektori, prof. J.Eltazarov kutib oldi va oliygoh bilan ushbu Dunyoning Top 300 taligida o‘rin egallab turgan Gonkong Politexnika universiteti bilan turizm sohasida mutaxassislar tayyorlash borasida hamkorlik qilishdan manfaatdor ekanligini ta’kidladi. Gongkong Politexnika universiteti dekani, professor Kaye Chon ham turizm sohasida mutaxassislar tayyorlash, turli forumlar o‘tkazib borish ikki oliygoh uchun ham qilishdan manfaatdor ekanligini aytdi. 

Joriy yilning 18-oktabr kuni universitetimizga Pekin Xalqaro Tadqiqotlar universiteti kengashi raisining o‘rinbosari Wang Xiuyan boshchiligidagi delegatsiya a’zolari tashrif buyurdi. Mehmonlarni oliygohimiz Birinchi prorektori, prof. J.Eltazarov kutib oldi va keyingi yillarda universitetda turizm sohasiga kadrlar tayyorlash borasida amalga oshirilayotgan ishlar xususida ma’lumot berdi.

Ma’lumki, bugungi kunda universitetimiz Xitoy Xalq Respublikasining bir qator nufuzli universitetlari bilan turizm sohasida mutaxassislar tayyorlash bo‘yicha hamkorlik aloqalarini o‘rnatgan. Shuningdek o‘tgan o‘quv yilida 30 nafar oliygohimiz professor-o‘qituvchilari Xitoyda bo‘lib amaliyot o‘tab qaytishdi. Bundan tashqari Xitoydan kelgan professor-o‘qituvchilar ham talabalarga ta’lim-tarbiya berib kelmoqda. O‘zaro muloqot davomida Pekin Xalqaro Tadqiqotlar universiteti bilan ham hamkorlik aloqalarini o‘rnatish xususida kelishib olindi. 

Joriy yilning 18-oktabr kuni “Ipak yo‘li” tirizm va madaniy meros xalqaro universitetida “Kreativ taʼlim va innovatsiya – Yangi Oʻzbekiston taraqqiyotining asosi” shiori ostidagi “InnoWeek.uz-2023” haftaligi doirasida loyihalar taqdimoti o‘tkazildi.

Ushbu tadbirda universitetimizning iqtidorli, bilimga intiluvchan  talaba yoshlari tomonidan o‘ndan ortiq “StartUp” loyihalar taqdimoti qilindi va tanlov yakuniga ko‘ra, munosiblar o‘rtasida uchta o‘rin aniqlandi va eng yaxshi deb topilgan loyihalar mualliflariga pul mablag‘lari va sertifikatlar topshirildi.

Joriy yilning 16-20 oktabr kunlari Samarqand davlat universitetida “Kreativ taʼlim va innovatsiya – Yangi Oʻzbekiston taraqqiyotining asosi” shiori ostida “InnoWeek-2023” xalqaro innovatsion g‘oyalar haftaligi doirasidagi tadbirlar bo‘lib o‘tmoqda. Ushbu tadbirlarda “Ipak yo‘li” tirizm va madaniy meros xalqaro universiteti professor-o‘qituvchilari hamda talabalari ham o‘zlarining yetuk innovassion loyihalari bilan faol ishtirok etib kelmoqda.

Joriy yilning 18-oktabr kuni universitetimizga taniqli xalqaro biznes jurnalist va CNN telekanali boshlovchisi Richard Kvest universitetimizga tashrif buyurdi. Richard Kvestni tanimagan u haqida bilmagan yoshlar juda kam bo‘lsa kerak. U o‘zining biznes haqidagi kreativ va teran fikrlari bilan ko‘pgina muxlislariga ega boshlovchi sifatida tanilgan. Richard Kvestning oliygohimiz professor-o‘qituvchilari va talabalari uchrashuvi juda qiziqarli bo‘lganligi bilan kreativ savol javoblarga boy bo‘lganligi bilan ahamiyatli bo‘ldi. Tadbirni universitet prorektori J.Hoffman olib bordi va Richard Kvestga so‘z berdi. Richard Kvest talaba yoshlarga bugungi kunda turizm biznesini rivojlantirishning asosiy omillari nimalardan iborat bo‘lishi xususida savol bilan murojaat qildi. Talaba yoshlar, hatto professor-o‘qituvchilar ham muloqot jarayoniga kirishib ketishdi va savollarga javob berishga harakat qildi.

“Men ushbu turizm sohasiga mutaxassislar tayyorlab beradigan universitet talabalarining javoblaridan, ularning teran va kreativ fikrlaridan to‘g‘risi xursand bo‘ldim. O‘zbekiston mana bunday turizm sohasidagi bilimli yoshlar bilan yanada rivojlanishiga aminman”,- deydi Richard Kvest.